Fréttir

Siglufjörður – Ólafsfjörður Skólarútan fer frá Siglufirði föstudaginn 22. ágúst kl. 8:00 og 12:30 og frá Ólafsfirði er farið kl. 13:00 og kl. 15:45. Hægt er að skoða áætlanir vetrarins hér

Skólasetning verður í Tjarnarborg kl. 8:30 föstudaginn 22. ágúst. Strax á eftir er fundur nemenda með umsjónarkennurum sínum og síðan hefst kennsla samkvæmt stundaskrá. Við hlökkum til að hitta eldri nemendur og kynnast nýjum!

Atli Tómasson stúdent 2013 hefur tekið þátt í tveimur myndlistarsýningum í sumar. Önnur var samsýning listamanna í Fjallabyggð og listamanna í Listhúsi í Fjallabyggð í Tjarnarborg. Hin var einkasýning hans í Bláa húsinu á Siglufirði. Atli er nú nemandi í fagurlistum við Myndlistarskólann á Akureyri og mikilvirkur í listiðkun sinni. Við gömlu kennararnir hans fylgjumst stolt með honum feta listabrautina.

Nú eru starfsmenn komnir í sumarleyfi. Skólinn opnar aftur 5. ágúst. Ef nauðsyn krefur er hægt að senda póst á mtr@mtr.is eða hringja í skólameistara Láru Stefánsdóttur í síma 896-3357.

Átta nemendur gerðu á vorönn lokaverkefni sem metið var til fimm eininga. Allir kynntu þeir verkefnin sín eftir að kennslu lauk og kom í ljós að þau voru fjölbreytt og athyglisverð. Eitt bar titilinn „Frá getnaði til fæðingar“ og fjallaði um þroskaferil fósturs í móðurkviði. Annað verkefni nemanda af náttúrufræðibraut var um óhefðbundnar lækningar og það þriðja um gróðurhúsaáhrifin. Nemandi á listabraut lagði fram og skýrði ferilmöppu og nemandi á hug- og félagsvísindabraut gerði heimildaritgerð um kvíðaraskanir barna. Nemandi á íþróttabraut gerði lokaverkefni um „fyrstu snertingu“ við knöttinn í fótbolta og skilaði æfingamyndbandi þar sem félagi hans sýndi atriðin. Annar nemandi á sömu braut fjallaði um Unglingalandsmót UMFÍ og möguleika á því að halda slíkt mót í Fjallabyggð. Líklega var óhefðbundnast verkefnið sem fjallaði um aðferðir og skipulag við að læra fyrir inntökupróf í læknisfræði, en þar byggði nemandinn á eigin vinnu og upplifun á önninni.

Kennararnir Bjarki Þór Jónsson og Tryggvi Hrólfsson hafa fengið styrk frá RANNÍS að upphæð 1,4 milljónir króna til að búa til kennsluefni sem verður aðgengilegt kennurum sem vilja búa til áfanga í töluvleikjafræðum. Tvímenningarnir hafa á vorönn kennt slíkan áfanga sem þeir hafa hannað. Áfanginn þótti takast vel en hann er ekki aðallega um spilun tölvuleikja heldur um hönnun þeirra og innviði.

Fiskverkun er algengt mótív íslenskra málara en sjaldgæft er að fisktegund sé tilgreind. Myndina málaði Sarah Jane eftir ljósmynd sem tekin var um næstsíðustu aldamót. Sarah Jane er náttúrubarn sem ferðast hefur um allan heim en vill verða Íslendingur. Hún hefur búið í Ólafsfirði og stundað nám við skólann í vetur en ætlar að vera í fjarnámi frá Sauðárkróki á næstu önn.

Stærsti hópur til þessa brautskráðist frá skólanum í dag. Í lok haustannar útskrifuðust átta stúdentar þannig að brautskráðir nemendur eftir veturinn eru tuttugu og fimm. Skólinn tók til starfa haustið 2010 og er þetta 8. útskriftin. Samtals hafa 58 nemendur útskrifast frá skólanum. Hann hefur verið fullsetinn í tvö ár miðað við þær áætlanir sem gerðar voru áður en hann tók til starfa.

Skólinn er fyrirmyndarstofnun í flokki meðalstórra stofnana í könnun Stéttarfélags í almannaþjónustu ásamt Einkaleyfastofu, Landmælingum, Menntaskólanum að Laugarvatni og Skipulagsstofnun. MTR varð í öðru sæti í flokknum, aðeins Einkaleyfastofa fékk fleiri stig. Þetta er í níunda sinn sem SFR velur stofnun ársins og var niðurstaðan kynnt í Hörpu í gær.

Fræðslu og skemmtun var blandað saman í vorferðinni í gær. Fyrsta stopp var í Fjölbrautaskóla Norðurlands vestra FNV á Sauðárkróki. Góð aðstaða fyrir verknám og almennt huggulegt umhverfi í öllum skólanum vöktu athygli. Eftir góða máltíð hjá Skagfirðingum var ekið fyrir Skaga og naut hópurinn frábærs útsýnis eins og myndin úr Kálfshamarsvík ber með sér.