Fréttir

Þessi álftarsteggur hefur haldið sig í Ólafsfirði með kellu sinni hvert sumar síðan 2004. Þau hafa gert sér hreiður við stífluna í Skeggjabrekkudal nema 2008. Þá var allt á kafi í snjó við stífluna og þau færðu sig á bakka Ólafsfjarðarvatns neðan við Hornbrekku. Fyrstu árin voru ungarnir fáir en í fyrra komu þau upp fimm ungum.

Vegna verkfalls KÍ verður vorönn breytt á eftirfarandi hátt: Kennt verður 22. apríl. Síðasti kennsludagur verður 15. maí. Vorsýning verður 17. maí. Útskrift verður 24. maí.

Fáni var dreginn að hún í morgun og skólastarf hófst aftur af fullum krafti eftir þriggja vikna verkfall kennara. Álíka margir nemendur eru mættir og venja er til á mánudögum og að sjálfsögðu allir kennararnir. Í lok dags verður ákveðið hvernig staðið verður að því að vinna upp það sem tapaðist í verkfallinu.

Á mánudag hefst kennsla samkvæmt stundaskrá og eru nemendur hvattir til að mæta vel. Þá fara kennarar yfir stöðuna með nemendum til að meta hver hún er. Í lok dags verður kennarafundur þar sem tekin verður ákvörðun um hvernig unnið verður úr töpuðum tíma. Samkvæmt samkomulagi í tengslum við kjarasamning má bæta við allt að 6 dögum við. Jafnvel meiru ef fjármunir eru til fyrir því. Þannig byggist ákvörðunin verulega á því hversu duglegir nemendur hafa verið við nám í verkfalli. Hvaða dagar teknir verða á því eftir að koma í ljós. Hlökkum til að sjá ykkur öll fersk á mánudag!

Söngkeppni framhaldsskólanna fer fram 5. apríl í Hofi á Akureyri. Keppandi skólans er Matthías Gunnarsson nemandi á Listabraut - skapandi tónlistarsviði. Vegna verkfalls félagsmanna KÍ fer enginn starfsmaður skólans með og eru nemendur því á eigin ábyrgð fari þeir til Akureyrar.

Líf og fjör var í skólanum í dag þegar nemendur á starfsbraut mættu til náms. Á starfsbraut eru 12 nemendur og þeim fylgja 2 stuðningsfulltrúar ásamt kennara og nám stundað af kappi. Í dag voru nemendur að læra að gera upp gamla stóla og hlakka til útkomunnar. Kennslan er í höndum Agnesar Sigurjónsdóttur iðjuþjálfa.

Rútuferðir frá Siglufirði og Dalvík falla niður í dag föstudag vegna óveðurs.

Því miður tókst ekki að ljúka samningum framhaldsskóla áður en verkfall skall á, enginn getur sagt til um hversu lengi það varir og er nemendum og starfsmönnum bent á að fylgjast með framgangi mála í fjölmiðlum. Hluti kennara á starfsbraut fara ekki í verkfall og kennsla er í LIL3C05, TÓH, og TFR. Mestu skiptir fyrir nemendur að vera virka í verkfallinu, læra eins og þau best geta til að reyna að tryggja að önnin fari ekki í súginn. Í Moodle á að vera kennsluáætlun í hverjum áfanga sem nemendur geta farið eftir. Hér á eftir eru frekari upplýsingar.

Margir nemendur hafa áhyggjur af því að verkfall kennara hafi slæm áhrif á nám þeirra. Sumir eru farnir að huga að vinnu og jafnvel búnir að ráða sig til vinnu ef til verkfalls kemur. Aðrir hafa hugsað sér að taka því rólega en reyna eftir bestu getu að nota tímann til lærdóms. Verkfallið hefst á mánudag ef samningar takast ekki áður.

Hópur MTR-nema í Comeníusarverkefni nýtur veðurblíðu á Spáni á meðan hríðarveður er hjá okkur. Krakkarnir eru í áfanganum Vatn og líf og verða á Spáni í viku ásamt kennara áfangans, Ingu Eiríksdóttur, stærðfræðikennara. Þau eru með nemendum frá Ítalíu og Þýskalandi, auk spænsku gestgjafanna.