Fréttir

Bleik górilla og blómarós voru í hópi nemenda í inngangi að félagsvísindum í morgun. Tilefnið er hrekkjavakan sem nú hefur náð alla leið á Tröllaskaga og hefur spurst út að fleiri nemendur séu á leið í skólann sérstaklega uppáfærðir í tilefni dagsins. Áhugafólk um hrekki ætlar líka að bjóða nemendum upp á andlitsskreytingu síðar í dag.

Kennarar frá háskólabrú Keilis heimsóttu okkur í útivistar- og fjallamennskuáfangana og kynntu fyrir okkur leiðsögunám í ævintýramennsku á háskólastigi. Þetta nám er á vegum Thopmson Rivers University(TRU) í Kanada og fá nemendur skírteini frá þeim. Þetta er átta mánaða nám sem hentar vel þeim sem hafa mikinn áhuga á ferðamennsku og útivist við krefjandi aðstæður

Síðastliðinn fimmtudag heimsóttu nokkrir nemendur af starfsbraut Leikhóla. Heimsóknin var hluti af námi nemenda þar sem þeir kynna sér vinnustaði í nágrenninu. Eins og sjá má á myndunum sem fylgja með fréttinni er hópurinn eingöngu skipaður strákum að þessu sinni.

Sýningin BINNI með myndum frá Ólafsfirði verður opnuð í skólanum á morgun. Eitt hundrað ár eru frá fæðingu Binna, Brynjólfs Sveinssonar kaupmanns og stendur fjölskylda hans fyrir sýningu á myndum hans og kvikmyndum. Nokkrar myndir verða sýndar á Kaffi Klöru en þar var vinnustaður Binna á dögum Pósts og síma.

Starfsbrautarnemar tóku þátt í hraðamælingum með lögreglunni á Dalvík í miðannarvikunni. Þetta kemur fram í Tröllaskagablaðinu sem nemendurnir hafa skrifað um miðannarvikuna. Í blaðinu eru viðtöl við nokkra nemendur og einnig við kennara sem leiðbeindu nemendum við fjölbreytt verkefni í vikunni. Blaðið er aðgengilegt á heimasíðu skólans.

Hvernig nálgast listamenn tímann? Hvernig birtist tíminn í listaverkum? Þessar spurningar glímdu nemendur við í miðannarvikunni. Í áfanganum var lögð áhersla á ólíkar nálganir listamanna og hvernig tíminn sýnir sig í listaverki - sem efniviður, vandamál, þema eða innblástur.

Margir nemendur völdu að læra undirstöðuatriðin í hekli í miðannarvikunni. Þar koma við sögu fyrirbæri eins og loftlykkjur, fastalykkjur, keðjulykkjur, stuðlar og tvöfaldir stuðlar. Þar sem flestir voru byrjendur þurftu þeir líka að læra að snúa við og hekla í hring. Þá er mikilvægt að geta lesið úr munstrum og uppskriftum í þar til gerðum leiðbeiningum.

Hugmyndgleði einkenndi fjölbreytt verk nemenda í myndlistaráfanga í miðannarvikunni. Nemendur unnu út frá hugtakinu tími og birtust ýmis skemmtileg og ólík verk við þessa vinnu, allt frá vídeóverki, gjörning, skúlptúr og málverkum. Kennari var Bergþór Morthens, kennari við skólann. Bergþór er í námsleyfi eins og er en kom sérstaklega heim til að kenna nemendum þennan áfanga. Myndirnar sem fylgja fréttinni voru teknar á sýningu á verkum nemenda í úrgangslistinni í lok miðannarviku.

Í miðannarviku í ár fá nemendur nasasjón af fjölmörgum íþróttagreinum. Á mánudag fór hópurinn í júdó í Draupni á Akureyri og það var enginn annar en Jón Óðinn Waage (Ódi) sem tók á móti hópnum og sýndi grunnatriðin í íþróttinni. Eftir hádegi var Fimleikafélag Akureyrar sótt heim og fengu nemendur að leika lausum hala í hinu stórglæsilega fimleikahúsi Akureyringa.

Starfsbrautarnemendur heimsóttu ljósavakamiðlana á Akureyri í vettvangsferð í gær. Þeir kynntu sér fyrst starfsemi Ríkisútvarpsins og skoðuðu húsnæði fjölmiðilsins, sem þeim þótti ekki láta mikið yfir sér. En athyglisvert þótti nemendum að fylgjast með þegar verið var að klippa efni í sjónvarpsþáttinn Landann og einnig þegar starfsmenn voru að raða fréttum í fréttatíma í útvarpinu.