Fréttir

Gísli Kristinsson heldur ljósmyndasýningu um Sjómannadagshelgina í Menntaskólanum á Tröllaskaga. Sýningin er opin föstudag; 17-19 laugardag: 14-18 og sunnudag 14-18. Sýndar verða 6 myndir frá samsýningu sem haldin var í Minjasafninu á Akureyri og hét Næturbirta Norðursins og 14 nýlegar myndir teknar 2014-2015.

Brynja Sól Guðmundsdóttir gerði tilraun til að líkja eftir hengigörðunum í Babýlon í lokaverkefni sínu. Hún byrjaði á að kaupa það sem þurfti til, bakka með loftdælu, steinull, vikur, fræ og fleira. Næsta skref var að setja upp og sá fræjunum. Tilraunin hófst í febrúar og lauk í síðustu kennsluvikunni í maí. Niðurstaðan var að flestar jurtirnar döfnuðu vel.

Í knattspyrnu er aðeins ein regla um persónuhlífar. Hún er um legghlífar. Einnig eru til hjálmar sem verja höfuð leikmanna í skallaeinvígjum en engar reglur eru um notkun þeirra. Örn Elí Gunnlaugsson fjallaði um höfuðáverka í knattspyrnu í lokaverkefni sínu á íþróttabraut. Hann telur að afleiðingar höfuðmeiðsla séu mun alvarlegri en slysa á fótum og setur spurningamerki við forgangsröðunina

Nordic Game Awards eru tölvuleikjaverðlaun þar sem rjóminn af norrænni tölvuleikjagerð er kynntur. Í dómnefnd sitja fulltrúar frá öllum Norðurlöndunum og sat Bjarki Þór Jónsson, kennari við Menntaskólann á Tröllaskaga, í dómnefnd fyrir Íslands hönd þetta árið. Vinningshafarnir voru kynntir á Nordic Game ráðstefnunni sem fór fram í Malmö dagana 20.-22. maí.

Menntaskólinn á Tröllaskaga er ekki með fjarnám í sumar. Innritun í fjarnám fyrir haustið stendur yfir og er á sama tíma og önnur innritun. Einungis er tekið við nemendum í námshópa með staðnemendum þar til hópar eru fullir. Því takmarkast námsframboð í fjarnámi við rými í námshópum.

Algengt virðist að stúlkur hefji neyslu eiturlyfja vegna þess að kærastar þeirra eru neytendur. Við vinnslu lokaverkefnis ræddi Aníta Sara Sigurðardóttir við fimm einstaklinga sem höfðu verið í mikilli neyslu. Viðmælendur voru á aldrinum 13-18 ára þegar þeir hófu neysluna. Stúlkurnar þrjár höfðu allar byrjað vegna þess að kærastar voru neytendur en strákarnir sögðust hafa byrjað af forvitni og spennu.

Algengt virðist að einstaklingar sem keppt hafa í fitness falli í þunglyndi eftir keppni – sérstaklega eftir að þeir hafa keppt í fyrsta skipti. Sumir keppa ekki oftar. Guðrún Stefanía Jakobsdóttir kannaði fyrirbærið keppnisþunglyndi og fjallaði um það í lokaverkefni sínu. Hún brautskráðist af íþrótta- og útivistarbraut síðastliðinn laugardag.

Þrjátíu og einn nemandi brautskráðist frá Menntaskólanum á Tröllaskaga í morgun. Þetta er langstærsti hópur sem brautskráðst hefur frá skólanum en samtals eru útskrifaðir 97. Í morgun brautskráðust 12 af félags- og hugvísindabraut, fimm af íþróttabraut, fimm af náttúruvísindabraut, fimm af starfsbraut og fjórir af listabraut. Nemendur á vorönn voru um 230 en starfsmenn tuttugu og fimm. 43% nemenda voru úr Fjallabyggð en 13% frá Dalvík.

Menntaskólanum barst í morgun tilkynning um að skólinn hefði fengið Erasmus+-styrk fyrir verkefnið „Skapandi og nýstárlegar lausnir í menntun“ sem er í flokknum „Nám og þjálfun“. Upphæð styrksins er nær 11 þúsund evrur og skal féð nýtt innan árs. Umsókn skólans fékk 85 stig af 100 mögulegum. Umsjónarmaður verkefnisins er Ida Semey.

Nemendaverkefni úr fjölmörgum námsáföngum njóta sín vel á Vorsýningu skólans sem er opin út vikuna á vinnutíma. Nokkur verk fjalla um sköpunarferlið sjálft en myndverk og listrænar ljósmyndir eru áberandi. Frumleg verkefni tengd tungumálanámi, svo sem leikir og spil á dönsku og ferðaupplýsingar um Tröllaskaga þýddar á spænsku setja svip á sýninguna. Einnig verkefni úr jákvæðri sálfræði og ensku sem fjalla um mannréttindi, ást og gleði. Þá má nefna ýmis verkefni starfsbrautarnema, stétt úr ólafsfirsku fjörugrjóti og gjörninginn „fjárhagsaðstoð að handan“.