Fréttir

Fulltrúar MTR í ungmennaráði Fjallabyggðar eru Haukur Orri Kristjánsson og Óskar Helgi Ingvason. Vaka Rán Þórisdóttir, sem einnig er nemandi við skólann er fulltrúi Ungmenna- og Íþróttasambands Fjallabyggðar. Haukur Orri og Vaka Rán voru kjörin formaður og varaformaður ráðsins á fyrsta fundi þess sem haldinn var í vikunni.

Veggi Menntaskólans á Tröllaskaga prýða mörg listaverk eftir bæði innlenda og erlenda listamenn og á skólinn orðið ágætt safn listaverka. Sumt hefur skólinn keypt á ferli sínum, annað hefur skólanum borist að gjöf frá velunnurum. Listaverk eru víða í skólanum og hefur verið leitast við að hafa listaverk í sem flestum kennslustofum og öðrum rýmum þar sem nemendur og starfsmenn eiga leið um. Myndlist er þannig þáttur í daglegu umhverfi þeirra sem í skólanum eru. Ætlunin er að gera þessum verkum skil á heimsasíðu skólans og kynna til sögunnar Listaverk mánaðarins.Við hæfi er að byrja á verki eftir Kristinn G. Jóhannson (1936) en hann var Skólastjóri við Gagnfræðaskólann í Ólafsfirði um árabil.

Hópur nemenda kynnti sér uppeldisfræði í miðannarvikunni. Námskeiðið samanstóð af stuttum fyrirlestrum, verkefnavinnu og vettvangsferðum. Farið var í Háskólann á Akureyri, Grunnskóla Fjallabyggðar og leikskólana Leikhóla á Ólafsfirði og Hólmasól á Akureyri. Það er Hjallastefnuskóli og þótti nemendum MTR athyglisvert að kynnast starfinu þar og hitta Margréti Pálu Ólafsdóttur, frumkvöðul í leikskólastarfi hér á landi.

Starfsbrautarnemar teiknuðu á púðaver, könnur og glös og máluðu krukkur og dósir fyrir kerti, í miðannarvikunni. Einnig urðu til stjörnur úr íspinnaspýtum. Þau lærðu líka spænsku og bökuðu kanilsnúða. Í menningar- og safnaferð skoðaði hópurinn Smámunasafnið í Sólgarði, Saurbæjarkirkju, Iðnaðarsafnið og safn Sigurvins með módelbílum og flugvélum.

Í miðannarvikunni valdi hópur nemenda að leggja stund á skapandi skif hjá Sigrúnu Valdimarsdóttur. Allir sömdu ljóð og sögur og sumir leikrit. Til varð leikþátturinn „Tveir á fjalli“ sem greinir frá tveimur vinum í Fjallabyggð sem ákveða að fara á Humarhátíðina á Höfn í Hornafirði á hestinum Glófaxa.

Seinna í vikunni frumsýna uppistandararnir Dóri DNA og Saga Garðarsdóttir „Þetta er grín, án djóks“ í Menningarhúsinu Hofi á Akureyri. Þau gáfu nemendum MTR forsmekkinn í morgun og léku atriði úr verkinu þar sem samskipti kynjanna og viðhorf eru í brennidepli. Dóri og Saga eru höfundar verksins en leikstjóri er Jón Páll Eyjólfsson og Snorri Helgason sér um tónlistina.

Hópur nemenda hefur í miðannarvikunni iðkað tónlistarspuna og samspil undir stjórn Auðar Guðjohnsen og Halldórs Sveinssonar. Hópurinn heldur hádegistónleika í Tjarnarborg kl. 12 á morgun föstudag þar sem flutt verður afurð vikunnar. Allir gestir hjartanlega velkomnir!

Hópur nemenda lærir í miðannarvikunni grunninn í hönnun smáforrita fyrir Android stýrikerfið. Patrekur Þórarinsson einn nemendanna segir að þetta gangi að mestu leyti vel. Notað sé forritið Android Studio, sem sé mjög flókið. Það taki líka mikið á tölvurnar og vinni því oft mjög hægt.

Gerð hljóðskúlptúra er ung listgrein þar sem listamenn nota ýmsa hljóðgjafa sem efni í sköpun sína – oft í samhengi við ákveðin rými. Í þessum miðannaráfanga er lögð sérstök áhersla á gerð hljóðgjafa sem eru bæði skúlptúrar og hljóðfæri. Nemendur sýna afrakstur vinnunnar í Björgunarsveitarhúsinu í Ólafsfirði á föstudag. Allir íbúar í Fjallabyggð og nágrenni eru velkomnir á sýninguna milli kl. 13:00 og 15:00.

Nemendur í ÚTIDAN-áfanganum áttu frábæran dag í gær. Klifur í trjám í Hundaskógi og vindrenningur (windsurfing) voru meðal viðfangsefna en einnig hjólreiðar og almenn útivist. „Í útivistinni vorum við að tálga og hnýta hnúta og gerðum okkur kakó, hreint útsagt frábær dagur“, segir á fréttasíðu hópsins.