Fréttir

Hugmyndgleði einkenndi fjölbreytt verk nemenda í myndlistaráfanga í miðannarvikunni. Nemendur unnu út frá hugtakinu tími og birtust ýmis skemmtileg og ólík verk við þessa vinnu, allt frá vídeóverki, gjörning, skúlptúr og málverkum. Kennari var Bergþór Morthens, kennari við skólann. Bergþór er í námsleyfi eins og er en kom sérstaklega heim til að kenna nemendum þennan áfanga. Myndirnar sem fylgja fréttinni voru teknar á sýningu á verkum nemenda í úrgangslistinni í lok miðannarviku.

Í miðannarviku í ár fá nemendur nasasjón af fjölmörgum íþróttagreinum. Á mánudag fór hópurinn í júdó í Draupni á Akureyri og það var enginn annar en Jón Óðinn Waage (Ódi) sem tók á móti hópnum og sýndi grunnatriðin í íþróttinni. Eftir hádegi var Fimleikafélag Akureyrar sótt heim og fengu nemendur að leika lausum hala í hinu stórglæsilega fimleikahúsi Akureyringa.

Starfsbrautarnemendur heimsóttu ljósavakamiðlana á Akureyri í vettvangsferð í gær. Þeir kynntu sér fyrst starfsemi Ríkisútvarpsins og skoðuðu húsnæði fjölmiðilsins, sem þeim þótti ekki láta mikið yfir sér. En athyglisvert þótti nemendum að fylgjast með þegar verið var að klippa efni í sjónvarpsþáttinn Landann og einnig þegar starfsmenn voru að raða fréttum í fréttatíma í útvarpinu.

Útilega í október krefst góðs búnaðar. Ella getur kuldi, vindur og úrkoma gert lífið nánast óbærilegt. Nemendur í fjallamennsku- og útivistaráföngum fengu að reyna þetta um helgina þegar þeir gengu í óbyggðum í Héðinsfirði og eyddu þar einni nótt. Tjaldað var í grennd við gamalt slysavarnarskýli og kom sér sannarlega vel að geta skriðið þar í skjól, snætt nestið og yljað sér á tánum.

Miðannarvikan hófst með trukki í dag þegar nemendur í myndlistarvali endurgerðu að ákveðnu leyti gamlan gjörning. Hann var sóttur var í greipar FLUXUS hreyfingarinnar sem var upp á sitt besta í upphafi sjöunda áratugar síðustu aldar. Áhrifa þessarar stefnu gætir enn í listum nútímans og fengu nemendur smá nasasjón af því er þeir endurgerðu tónlistargjörning með verulega óvenjulegum hljóðfærum. Vatni var hellt úr mismunadi ílátum í önnur ílát úr nokkurri hæð og skapaði bunan milli íláta tónlistina. Gjörningurinn stóð þar til vatnið kláraðist. Leiðbeinandi í sköpuninni var Bergþór Morthens, myndlistarmaður.

Þótt sumarið væri hlýtt eru enn vænir skaflar í Hestsskarði, á gömlu gönguleiðinni milli Héðinsfjarðar og Siglufjarðar. Nemendur og kennarar í fjallamennsku voru þar á ferð um síðustu helgi og upplifðu óvenjulega stund í skarðinu þegar nýsnævi gusaðist yfir þá af sköflunum eins og kókoskurl. Rúnar Gunnarsson segir að þetta hafi verið afar sérstakt. Hestsskarð er í um 600 metra hæð og fékk hópurinn þar bjart og fallegt veður eins og myndirnar bera með sér.

Stundum þarf kjark og hugrekki til að taka stjórnina í eigin lífi. Fólk leggur upp í lífssiglinguna með ólíka hæfileika og ólík markmið en flestir eiga sér draum um hamingjuríkt líf. Gott getur verið að haga sér eins og sjóræningi ... og leita að fjársjóðum í eigin lífi. Þetta sögðu Ida Semey og Vera Sólveig Ólafsdóttir á geðræktarsamkomu skólans í Tjarnarborg í dag.

Við tökum geðræktardaginn snemma og höldum upp á hann á morgun, miðvikudag, í Tjarnarborg. Kristján M. Magnússon, sálfræðingur skólans flytur fyrirlestur og kennararnir Ida Semey og Vera Sólveig Ólafsdóttir halda erindi. Tónlist milli talmálsliða léttir lundina. Dagskráin er hluti af verkefninu „heilsueflandi framhaldsskóli“ en þema skólaársins er geðrækt. Í því er lögð áhersla á að bæta líðan nemenda og starfsmanna. Samkoman hefst klukkan 11:00.

Eins og fyrr hefur verið frá sagt eru nemendur á starfsbraut að kynna sér ýmsar hliðar atvinnulífsins á þessari önn. Hópurinn skoðaði Mánaberg, togara Rammans við bryggju á Siglufirði í gær. Mesta athygli vakti hvað lítið pláss var í skipinu neðanþilja og þröng vinnuaðstaða áhafnarinnar.

Í smábátahöfninni í Ólafsfirði eru aðstæður ákjósanlegar til sjósunds þegar átt er suðlæg og sjórinn heilnæmur. Þannig stóð á í gær og hiti í sjónum var tíu stig. Nemendur í útivistaráfanga fóru með kennara sínum, Gesti Hanssyni, og tóku létta æfingu. Gestur segir að kuldasjokkið gangi oftast hratt yfir, ef fólk nái að anda rólega telja upp að þrjátíu áður en það stekkur upp úr.