Fréttir

Þeir sem stofnuðu líftæknifyrirtækið Prímex á Siglufirði árið 1997 hafa tæplega búist við því að það ætti eftir að selja framleiðslu sína eigendum allt of feitra gæludýra. En það er raunin. Í um það bil hálft ár hefur verið í boði í Bandaríkjunum framleiðsluvara sem á að gera eigendum dýranna fært að megra þau án þess að minnka fæðuskammtinn.

Nemendur í listgreinum gróðursettu tungumálatré á vegginn í anddyri skólans í morgun. Tilefnið er evrópski tungumáladagurinn sem er í dag. Þá er vakin athygli á fjölbreyttum tungumálum sem töluð eru í álfunni. Nemendur í dönsku, ensku og spænsku ætla næstu daga að laufga tréð með hnyttni og kveðjum á ýmsum málum.

Engin þjóð nýtir fisk betur en Íslendingar og nýtingin batnaði með kvótakerfinu. Þetta sagði Andri Viðar Víglundsson sjómaður á Kleifaberginu nemendum í Tröllaskagaáfanga. Andri Viðar skýrði skipulag og vinnuferla um borð í togara með aðstoð Grétars Áka Bergssonar nemanda í áfanganum. Myndband sem Grétar Áki gerði sýnir veiðar, vinnslu og frágang afla í Mánaberginu.

Hópur nemenda MTR seldi dagatal til styrktar Unicef í Feneyjum, við Gardavatnið og í Verona á Ítalíu í síðustu viku. Dagatalið er afrakstur Comeníusarverkefnis þar sem þemað er vatn. Nemendur héðan og úr þremur skólum á Ítalíu, Spáni og í Þýskalandi tóku myndirnar. Sex nemendur og tveir kennarar héðan tóku þátt í ferðinni.

Nemendur og starfsmenn skólans geta nú virt fyrir sér og þefað af Holuhrauni hinu nýja. Hér leit við hollvinur skólans Sigurður Ægisson, sem hafði verið við gosstöðvarnar og gripið með sér mola til að nemendur í jarðfræði færu ekki alveg á mis við það helsta sem er að gerast á þeirra sviði í landinu.

Í sjónum út af Norðurlandi mætast heitir og kaldir hafstraumar og það er misjafnt hve stórt svæði hvorir um sig ná yfir. Árferði í sjónum er mismunandi og stýrir fiskgengd á svæðinu. Ýsa og stór þorskur ganga til dæmis aðeins á miðin undan Norðurlandi á hlýskeiðum. Þetta sagði Valtýr Hreiðarsson, fiskifræðingur nemendum í Tröllaskagaáfanga í gær.

Könnun hefur leitt í ljós að kindur eru vinsælustu gæludýr nemenda í MTR. Það er því við hæfi að taka þátt í smölun og fjárrekstri með frístundabændum í Ólafsfirði á nýnemadaginn sem haldinn er hátíðlegur í dag. Féð var rekið gegn um bæinn til réttar undir styrkri stjórn Jóns Konráðssonar, gangnaforingja.

Vinnutímafyrirkomulagið í skólanum, vikuleg verkefnaskil og samfellt leiðsagnarmat vöktu mesta athygli þriggja kennara frá Slóveníu sem hér hafa verið í viku til að kynna sér skólastarfið. Þetta myndu þær vilja taka upp í Ljutomer. Þar eru 700 nemendur og fimmtíu kennarar. Skipulagið er hefðbundið bekkjarkerfi, stundaskrár eru fastar í forminu og námsmat er próf.

Norlandia í Ólafsfirði gerir tilraun til að þurrka kolmunna fyrir Asíumarkað. Hingað til hefur mestallur kolmunaafli Íslendinga farið í bræðslu. En fiskurinn er magur og verð fyrir mjölið lágt. Því er leitað leiða til að fá meira út úr hráefninu eins og Ásgeir Logi Ásgeirsson sagði nemendum í Tröllaskagaáfanga frá.

Oft hefur verið gestkvæmt hér í skólanum en fjöldinn náði hámarki í fimm heimsóknum á föstudag. Um fimmtíu kennarar úr Naustaskóla á Akureyri skoðuðu þá húsakynni, kynntu sér aðferðafræðina í skólanum, tölvunotkun, leiðsagnarmat og reynslu af nýju námsskránni. Kennurunum fannst námsframboðið hér spennandi. Eftir heimsóknina hélt hópurinn til Siglufjarðar og ætlaði að nýta síðari hluta starfsdagsins þar.