Fréttir

Kennslu er rétt að ljúka á þessu vori og margir kennarar brjóta upp hefðbundið nám með óhefðbunum aðferðum eða efni. Nemendur í eðlisfræði gerðu verklega æfingu á bílastæðinu í morgun. Námsmarkmið var að fá tilfinningu fyrir fyrsta og öðru lögmáli Newtons. Námsgögn voru tveir bílar og reiðhjól. Myndin sýnir fjóra nemendur draga kennarann, Óliver Hilmarsson, á hjólinu.

Vorfiðringur er viðfangsefnið í bráðsmellnu myndbandi sem nokkrir nemendur gerðu og sýndu á árshátíð sinni. Höfundar spottans eru Grétar Áki, Hákon, Heimir, Ívar og Örn Elí. Heimir á heiðurinn af tónlistinni. Jón Árni og Konni Gotta veittu aðstoð við textagerðina. Njótið ....(

Lára Stefánsdóttir, skólameistari spjallaði við bæjarstjóra landsins sem heimsóttu skólann í morgunn og starfsbrautarnemendur skemmtu þeim með tónlist. Þau spiluðu og sungu lagið „Sem aldrei fyrr“ eftir Bubba Morthens og vakti flutningurinn mikla hrifningu. Um fjörutíu bæjarstjórar eru gestir í Fjallabyggð og Dalvíkurbyggð og lýkur heimsókninni á Siglufirði í kvöld.

Nemendur útivistaráfanga skelltu sér í sjósund í smábátahöfninni í Ólafsfirði í morgun. Meðal hæfnimarkmiða á íþrótta- og útivistarbraut er að nemendur séu meðvitaðir um umhverfi sitt, hafi lært að njóta þess, virða og nýta á skynsamlegan hátt með sjálfbærni í huga. Lofthiti var 7 stig en sjávarhiti aðeins 4 og eftir sjósundið tóku menn úr sér hrollinn í heitu pottunum í sundlauginni.

Nemendur skólans eru í óða önn að leggja lokahönd á margvísleg verk fyrir vorsýningu skólans sem opnuð verður laugardaginn 17. maí. Margir eru að nostra við hljóðverk í tölvum en í morgun var Snæborg Ragna Jónatansdóttir að vinna við málverk sitt „gull af manni“ og naut leiðsagnar listakonunnar Garúnar í áfanganum Sköpun.

Óformleg könnun sem nemandi í fjölmiðlaáfanganum FÉL3F gerði fyrir helgina bendir til þess að flestir nemendur skólans séu komnir á réttan stað eftir verkfallið. Að mati flestra sem spurðir voru var hæfilega mörgum kennsludögum bætt við önnina og almennt töldu flestir að þeir væru búnir að vinna upp það sem tapaðist í verkfallinu.

Nokkur árangur varð af söfnun nemenda í áfanganum ABC skólahjálp í gær. Nokkrir komu og fengu sér kaffi og með því en enginn leigði borð til að selja varning á viðburðinum og voru það nokkur vonbrigði. Matarklúbbur starfsbrautar hjálpaði til við viðburðinn og sá um að baka skúffuköku, múffur og pönnukökur.

Brottfall, skilgreint sem munur á nemendum sem hefja nám og þeim sem skila sér til prófs, var 6,9% í MTR á árinu 2013. Þetta er mjög lág tala miðað við það sem algengt er í öðrum framhaldsskólum. Meðtaldir eru fjarnemar sem eru í sömu námshópum og dagskólanemar.

Nemendur í áfanganum ABC skólahjálp bjóða íbúum svæðisins í skólann 1. maí kl. 11-16. Hópurinn er að safna fé fyrir námsgögnum handa nemendum í ákveðnum grunnskóla í Úganda. Þar vantar helst tölvur og námsbækur. Vilyrði hefur fengist fyrir tölvum frá Íslandsbanka en eftir er að setja í þær harðan disk.

Föstudaginn 25. apríl – annan dag sumars – verður árshátíð skólans haldin í Tjarnarborg í Ólafsfirði. Þar verða fjölbreytt skemmtiatriði og veislumatur sem kemur frá Greifanum á Akureyri. Gestir þurfa að skrá sig og greiða miðann fyrirfram. Síðasti dagur til að ganga frá greiðslu er þriðjudagur 22. apríl. Arndís, Þórhildur og Björg taka við greiðslu.