Fréttir

Blúshátíð í Ólafsfirði er rótgróin bæjarhátíð en á undir högg að sækja varðandi aðsókn. Ekki er hins vegar vandamál að fá tónlistamenn til að koma fram. Tímamót verða á næsta ári þegar fimmtánda hátíðin er á dagskrá. Gísli Rúnar Gylfason, framkvæmdastjóri hátíðarinnar sagði nemendum í Tröllaskagaáfanga að fyrstu árin hefðu nær allir gestirnir verið heimamenn en nú kæmu um 80% að.

Í knattspyrnuáfanga eru 17 nemendur (16 strákar og 1 stelpa) sem allir hafa brennandi áhuga á þessari fjölmennustu íþróttagrein heims. Tvær kennslustundir eru á viku sem nýttar eru til að æfa íþróttina, þar sem höfuðáhersla er á tækni og leikskilning. Á mánudag var uppbrot í áfanganum þegar nemendur og kennari ásamt tveimur góðum vinum skelltu sér til Akureyrar.

Nemendur áfanga í fjallamennsku gengu leiðina um Fossabrekkur í gær. Veður var frábært, logn og heiðskírt eins og myndirnar sýna. Nánast alla leiðina var gengið á snjó þannig að þessi fimm stunda ganga varð að æfingu í vetrarfjallamennsku. Meðal búnaðar voru skóflur, snjóflóðastengur og ýlur. Í lok ferðar var komið myrkur og göngumenn settu upp ennisljós.

Erlendir samstarfsmenn okkar í fyrsta alþjóðlega verkefninu sem skólinn tekur þátt í eru komnir til Ólafsfjarðar. Þeir eru frá Ítalíu, Spáni og Þýskalandi. Ferðalagið gekk ekki alveg snurðulaust því vél þýska hópsins seinkaði og hann missti af Íslandsvélinni frá London og kom ekki til Keflavíkur fyrr en undir miðnætti og þurfti að eyða nóttinni í ferðina norður.

Þema vikunnar í Tröllaskagaáfanga eru bæjarhátíðir en árlega eru haldnar um 230 slíkar hátíðir hér á landi. Áhöld eru um hvort kalla eigi fjölmennustu hátíðina á Tröllaskaga, Fiskidaginn mikla á Dalvík, bæjarhátíð. Júlíus Júlíusson sem hefur verið framkvæmdastjóri hátíðarinnar frá upphafi sagði nemendum í dag að ekki væri vitað hvað hún kostaði, menn vildu ekki vita það.

Gönguleiðir eru margar á Tröllaskaga og sumar svo vinsælar að hundruð manna fara þær á hverju sumri. Flestar eru brattar og bjóða upp á fagurt útsýni þegar komið er efst í skörðin og á fjallatoppa. Björn Þór Ólafsson hefur samið lýsingar margra gönguleiða og fjallaði um þær í máli og myndum í Tröllaskagaáfanga.

Á Veðurstofu Íslands vinna eitt hundrað og fjörutíu menn við að fylgjast með veðri, skrá upplýsingar, spá og vara við náttúruvá. Tilgangurinn er að auka öryggi allra landsmanna. Sérstaklega eru traustar upplýsingar og spár um veður mikilvægar fyrir sjómenn og fólk sem starfar við samgöngur í lofti og á landi. Þetta sagði Sveinn Brynjólfsson, jarðeðlisfræðingur nemendum í útivist og fjallamennsku í morgun.

Nemendur og kennarar undirbúa komu góðra gesta í næstu viku. Þetta eru sextán nemendur á aldrinum 16-17 ára og fjórir kennarar þeirra. Gestirnir koma frá Ítalíu, Spáni og Þýskalandi. Heimsóknin er þáttur í Comeníusarverkefni sem skólinn tekur þátt í. Mikilvægt er að heimafólk taki gestgjafahlutverkið alvarlega og sinni gestunum eins og best má verða.

Árið 2015 verður stórt ár hjá Rauðku á Siglufirði. Þá verður Hótel SUNNA opnað en nú er beðið eftir að fylling undir húsið sigi í bátahöfninni. Hótelið verður tvær hæðir og mun skarta fjórum stjörnum. Finnur Yngvi Kristinsson hjá Rauðku greindi nemendum í Tröllaskagaáfanga frá því að þörf væri á mörgum nýjum starfsmönnum á árinu 2015.

Frumkvæði – sköpun og áræði eru einkunnarorð skólans. Í þessu getur meðal annars falist að þora að vera öðruvísi og hafa aðrar hefðir en ríkja í framhaldsskólum annars staðar á landinu. Busun nýnema tíðkast ekki Menntaskólanum á Tröllaskaga en í staðinn hjálpa nemendur eigendum sauðfjár í Ólafsfirði við smölun og rekstur til réttar.