Fréttir

Alexander Magnússon verður veislustjóri á jólaskemmtun skólans á föstudagskvöld. Samkoman verður í Tjarnarborg og húsið verður opnað klukkan 19:00. Maturinn kemur frá Bautanum á Akureyri, hangikjöt og þjóðlegir réttir í bland við pasta- og kjúklingarétti. Skemmtiatriðin eru að nokkru leyti enn sveipuð huliðsblæju en tónlistin verður tengd jólunum. Rútuferðir frá Dalvík og Siglufirði kl. 18:30 og til baka kl. 22:30.

Nemendur í Tröllaskagaáfanga eru þessa dagana að leggja síðustu hönd á viðskiptaáæltun sem er lokaverkefni þeirra í áfanganum. Þetta gera þeir í þriggja til fjögurra manna hópum og kynntu hóparnir verkefni sín fyrir samnemendum í kennslustund í gær. Ólöf Þóra, Alexía María, Kara og Dana Rún hafa gert viðskiptaáæltun fyrir fataverslun á Ólafsfirði.

Nemendur áttu ljúfa stund í morgun þegar þeir smökkuðu á jólabakstrinum frá Aðalbakaríi á Siglufirði og hlustuðu á íslensk jólalög. Trausti Karl Rögnvaldsson skipulagði og annaðist kökuboðið en Helen Meyers skreytti anddyri skólans. Boðið var upp á margar tegundir, meðal annars Söru Bernharðskökur, skeljar, súkkulaðibitakökur, vínartertu og kleinuhringi sem voru vinsælastir allra tegunda.

Aðventan gengur í garð á sunnudag og á mánudag æltum við að minna aðeins á hana. Aðalbakarí á Siglufirði býður nemendum og starfsmönnum skólans að bragða á jólabakstrinum. Trausti Karl er í starfsnámi í Aðabakaríi og hann ætlar að skipuleggja jólastund með veitingum í anddyri skólans. Hún hefst klukkan 9:30.

Nám og kennsla í forritun hér við skólann verður skipulagt í samstarfi í Skema, sem er framsækið sprotafyrirtæki á því sviði. Aðferðafræðin er studd niðurstöðum rannsókna á sviði sálfræði, kennslufræði og tölvunarfræði. Markmiðið er að veita menntun í takt við tækniþróun.

Mikil og góð þátttaka var í hreyfideginum, síðasta föstudag. Fimmtíu og tveir nemendur mættu í 104 hreyfistundir, þannig að meðaltalið er tvær hreyfistundir á mann. Allar íþróttagreinar sem boðið var upp á voru vel sóttar. Eins og myndirnar sýna ríkti leikgleði og einbeitni í íþróttahúsinu þennan dag.

Mjög góð þátttaka hefur verið í margvíslegum íþróttum á hreyfidegi skólans í dag. Tuttugu og sex nemendur tóku þátt í badminton og body pump í morgun og tuttugu í fótbolta. Þá fóru fimmtán í blak og nokkrir í sund og líkamsrækt. Íþróttahúsið hefur verið fullnýtt í morgun. Hreyfingin heldur áfram eftir hádegi og er þá meðal annars hægt að fara í innibandý og handbolta.

Menntaskólinn á Tröllaskaga er heilsueflandi framhaldsskóli og til að liðka líkamann, styrkja og hressa er búið að skipuleggja heilan hreyfidag með fjölbreyttum viðfangsefnum. Skipulagðar hreyfistundir verða í Íþróttamiðstöðinni á Ólafsfirði frá kl. 8:30 til 15:45. Stundatafla í bóklegum greinum heldur sér en nemendur eru hvattir til að fara í þær hreyfistundir sem þeir hafa áhuga á.

Matarklúbburinn Trölli er tekinn til starfa. Nemendur og starfsmenn skólans geta notið ávaxtanna af því á morgun. Þá verður klúbburinn með kökusölu í anddyri skólans. Í boði verða skúffukökur og tvær gerðir af Muffins. Matarklúbburinn hefur ekki posa og því verða viðskiptavinir að staðgreiða í krónum.

Nemendur í MTR eru búnir að stofna fjóra klúbba síðan Nemendafélagið Trölli var endurskipulagt í haust. Þetta eru tölvuklúbbur sem er fjölmennastur, matarklúbbur, viðburða- og skemmtiklúbbur og Mangaklúbbur. Á fulltrúaráðsfundi Trölla í gær var ákveðið að halda jólaskemmtun nemenda 6. desemember í Tjarnarborg.