Fréttir

Því miður tókst ekki að ljúka samningum framhaldsskóla áður en verkfall skall á, enginn getur sagt til um hversu lengi það varir og er nemendum og starfsmönnum bent á að fylgjast með framgangi mála í fjölmiðlum. Hluti kennara á starfsbraut fara ekki í verkfall og kennsla er í LIL3C05, TÓH, og TFR. Mestu skiptir fyrir nemendur að vera virka í verkfallinu, læra eins og þau best geta til að reyna að tryggja að önnin fari ekki í súginn. Í Moodle á að vera kennsluáætlun í hverjum áfanga sem nemendur geta farið eftir. Hér á eftir eru frekari upplýsingar.

Margir nemendur hafa áhyggjur af því að verkfall kennara hafi slæm áhrif á nám þeirra. Sumir eru farnir að huga að vinnu og jafnvel búnir að ráða sig til vinnu ef til verkfalls kemur. Aðrir hafa hugsað sér að taka því rólega en reyna eftir bestu getu að nota tímann til lærdóms. Verkfallið hefst á mánudag ef samningar takast ekki áður.

Hópur MTR-nema í Comeníusarverkefni nýtur veðurblíðu á Spáni á meðan hríðarveður er hjá okkur. Krakkarnir eru í áfanganum Vatn og líf og verða á Spáni í viku ásamt kennara áfangans, Ingu Eiríksdóttur, stærðfræðikennara. Þau eru með nemendum frá Ítalíu og Þýskalandi, auk spænsku gestgjafanna.

Eitt verkefnanna í áfanga um jákvæða sálfræði felur í sér að kynna lög sem nemendur nota til að koma sér í gott skap. Elsta lagið sem kynnt var í kennslustund í gær er frá 1968 en einnig voru spiluð ný og nýleg lög svo sem Bastille með Durban Skies.

Hópur nemenda MTR á leið til Valencia á Spáni rakst á bardagakappann Gunnar Nelson í millilendingu á Gatwickflugvelli í gær. Krakkarnir kannast við Gunnar því hann er dóttursonur Gunnars og Svanfríðar í Hlíð í Ólafsfirði. Hann var einn á heimleið með bakpokann eftir sigurinn á Rússanum Omar Akhmedov í UFC í Lundúnum.

Nú er búið að setja á vefinn frekari upplýsingar fyrir fjarnema skólans. Fjarnemar eru nú um fjórðungur nemenda og stunda nám samhliða staðnemendum. Í fjarnámi eru nemendur úr grunnskóla, nemendur að bæta við sig námsgreinum en eru í staðnámi í öðrum framhaldsskóla, nemendur sem eru að taka námið til stúdentsprófs og nemendur sem nú þegar hafa lokið stúdentsprófi en vilja bæta við sig ákveðnum fögum eða námsgreinum.

Nemendur nýttu hæfileika sína á ýmsan veg í umfjöllun um fjölgreindir Howards Gardner í miðannarvikunni. Fjallað var um eina eða tvær greindir á dag og farnar ólíkar vettvangsferðir í tengslum við efnið. Þegar fjallað var um tilfinningagreind máluðu nemendur af sér sjálfsmynd í tilfinningabundnum litum og þegar tónlistargreind bættist við var sungið og leikið lag í rappútsetningu

Fjölmörg börn í skrautlegum búningum hafa heimsótt skólann í tilefni dagsins. Allir eru í búningum og þiggja hóflegan nammipoka fyrir sönginn. Nemendur hafa líka tekið lagið, til dæmis Hallgrímur Stefánsson sem tók Krummi svaf í klettagjá og félagar hans sungu síðan með honum Hafið bláa hafið ... hugann dregur ...

Almenn ánægja var í hópi nemenda sem sóttu skyndihjálparnámskeið í miðannarvikunni. Á námskeiðinu voru kenndar ýmsar leiðir til að hjálpa og bjarga fólki sem hefur slasast eða orðið fyrir andlegum áföllum við slys eða í hamförum. Kennarar voru fjórir, allir þrautreyndir björgunar- eða lögreglumenn á vettvangi.

Áfangar í boði á haustönn 2014 eru komnir inn á vef skólans undir „námið“