Fréttir

Ellefu stúdentar brautskráðust frá Menntaskólanum á Tröllaskaga í morgun. Fimm af félags- og hugvísindabraut, einn af íþrótta- og útivistarbraut, þrír af náttúruvísindabraut, einn af kjörnámsbraut og einn lauk viðbót við starfsnám til stúdentsprófs. Sex nemendanna luku prófi á tveimur og hálfu ári. Samtals hefur skólinn brautskráð 108 nemendur.

Ævintýrapersónan Hiko var á röngum stað á röngum tíma. Hann var um borð í skipi á leið í fangelsi þegar sagan hófst. Lokaverkefni Vilhjálms Reykjalín Þrastarsonar fólst í að hanna og forrita hluti í leikinn og við kynningu þess sagðist hann hafa skoðað ýmislegt efni til að viða að sér hugmyndum um framvindu leiksins og verkfæri við gerð hans.

Fjölmenni skoðaði sýninguna á laugardag og þökkum við öllum fyrir komuna. Litlir skúlptúrar úr ArtFabLabinu eru áberandi á sýningunni. Nemendur hanna hlutina, teikna upp í tölvu og skera síðan út með leiserskera og setja saman verk í þrívídd. Einn nemandi skar frumsamin ljóð í stein og annar ljósmyndir á álplötur. Verk starfsbrautarnema tengjast flest verkum úr listasögunni en fókusinn er á nútímann og áhugamál hvers um sig.

Áfanganum íþróttagrein lauk með stæl síðdegis á síðasta kennsludegi haustannar. Fimm lið reyndu með sér í bandý, fjögur skipuð nemendum en eitt kennurum. Til úrslita kepptu A-lið nemenda og lið kennara, sem tapaði með eins marks mun. Áhugi er á að gera bandýmót að árlegum viðburði og bjóða gestum frá fleiri skólum til leika.

Hátíðin fer fram í Tjarnarborg. Húsið verður opnað kl. 18:30. Borðhald hefst kl. 19:00. Skemmtiatriði eru heimatilbúin og veislustjórinn er heimamaður, Konni Gotta. Rútuferð verður frá Siglufirði kl. 18:30 og til baka kl. 21:30.

Á Stórsýningunni á laugardag vera m.a. kynnt nokkur áhugaverð verkefni sem unnin hafa verið í frumkvöðlaáfanga skólans í haust. Nokkrir hópar hafa verið að störfum undanfarnar vikur við að skipuleggja eigin hugmyndir sem eiga að auka fjölbreytni í atvinnulífi og afþreyingu á svæðinu. Fjarnemar áttu að einbeita sér að sínu svæði. Hver kynning stendur í um 15 mínútur og verður hægt að bera fram spurningar til fyrirlesara. Hvetjum við gesti sýningarinnar til að líta inn og kynna sér hugmyndir unga fólksins. Kynningarnar verða í stofunni Hæringi.

Undirbúningur er í fullum gangi fyrir stórsýningu Menntaskólans á Tröllaskaga. Nemendur eru að leggja lokahönd á verkefni sín og upphengiferlið komið í gang. Sem fyrr er fjölbreytnin höfð að leiðarljósi og mun kenna ýmissa grasa á sýningaropnun laugardaginn 12. Desember. Má til dæmis nefna sjónlistir, ArtFabLab, útieldun og fjölda annara spennandi verkefna. Á laugardag verður opið kl. 13:00 - 16:00. Sýninguna verður einnig hægt að skoða í næstu viku á vinnutíma, frá kl. 8-16.

Hægt verður að kynna sér samstarfsverkefni menntaskólans og Fjordvang Ungdomsskole á Jótlandi á Haustsýningu skólans 12. desember. Hópur frá MTR dvaldi ytra í viku í byrjun október og verða á sýningunni frásagnir nemenda af ferðinni og verkefnum á vettvangi. Frásagnirnar eru bæði í myndum og máli og bæði á dönsku og íslensku.

Nokkrir frumkvöðlar úr nærsamfélaginu hafa á önninni komið í heimsókn í frumkvöðlaáfangann okkar og greint frá ýmsum verkefnum sem komin eru í framkvæmd eða áformað er að ráðast í. Þeir sem hlutu fyrstu og önnur verðlaun í verkefninu „Ræsing í Fjallabyggð“ komu og sögðu frá tillögum sínum. Nemendum þóttu hugmyndirnar mjög áhugaverðar og spurðu margs í framhaldi af frásögnum vinningshafa.

Könnun meðal brautskráðra nemenda skólans leiðir í ljós að flestir telja símatið helsta kost náms við skólann. Helmingur þeirra sem svöruðu nefndu símatið, 17% nefndu skipulag náms og fjölbreytni en 14% hve persónulegur skólinn væri og sama hlutfall ábyrgð á eigin námi en 10% nefndu kennslu og kennsluhætti.