Fréttir

Í Héðinsfirði vakti athygli nemenda hvernig Fjarðaráin hlykkjast á leið sinni í stöðuvatnið. Gil og gljúfur einkenna ung vatnsföll en með tímanum verða þau flatbotna og bugður einkenna gömul vatnsföll. Aðdráttarafl jarðar skýrir bugðurnar (hlykkina) á ánni, það togar til hægri og vatnið kastast síðan til baka og skellur á vinstribakkanum.

Nemenda bíða ný, fjölbreytt og spennandi verkefni í næstu viku en þá er miðannarvika skólans. Margir ætla að kynna sér skyndihjálp hjá Hörpu Jónsdóttur hjá Rauðakrossinum en áfanginn er skylda fyrir nemendur á útivistarsviði. Aðrir hafa valið að fara í tónlistarbúðir hjá Katrínu Ýr sem er söngkona og býr í London. Valin verða verkefni tengd tónlistarflutningi til að vinna með og flytja á tónleikum. Hópur nemenda hefur valið að læra um skordýr. Þau gegna lykilstöðu í þurrlendisvistkerfum jarðarinnar, hafa mikil áhrif á samfélög manna og hringrás næringarefna.

Hópur í námsferð í Alicante á Spáni nýtur sólar og tuttugu og fimm stiga hita í dag. Hjólaferð er á dagskránni. Í gær lærðu nemendur meðal annars að rata og lesa kort, að vera ekki með múður við öryggisverði og klæða sig áður en farið er í sporvagn eða á veitingahús.

Nemendur í áföngunum útivist og fjallamennsku fengu þá þraut að ganga að Vík í Héðinsfirði og gista þar í tjaldi yfir nótt. Þau voru búin að undirbúa sig með því að tjalda á skólalóðinni og voru skotfljót að því á áfangastað. Veðrið var hagstætt í þetta sinn - sól allan tímann.

Tolli, Sara Oskarsson og Hildur Bjarnadóttir voru meðal listamanna sem nemendur í áföngunum MYNL2GM og MYNL3FM hittu í lista-og menningarferð til Reykjavíkur. Starfandi listamenn voru heimsóttir á vinnustofur sínar og helstu söfnin skoðuð. Ferðin var fábær og lifir með nemendum og kennara.

Nemendur sem stunda nám útivist gengu að fjallaskálanum Mosa í vikunni en það er skáli sem er efst á Reykjaheiði á milli Dalvíkur og Ólafsfjarðar. Nemendur fóru í tveimur hópum og voru leiðsögumenn Gestur Hansson og Patrekur Þórarinsson.

Nemendafélagið skipulagði sérstaka dagskrá fyrir helgina þar sem markmiðið var að nýnemar kynntust eldri nemum og gagnkvæmt. Félagið bauð upp á pizzu í hádeginu og síðan var farið í ýmsa leiki. Skipt var í tvö lið og keppt í sparkó og fótbolta á sparkvellinum.

Mývatnssveit er fágætlega fjölbreytt kennslustofa í jarðfræði. Hópur nema í jarðfræðiáfanga notaði sér það fyrir helgina. Nemendur skoðuðu Dimmuborgir og kynntust því hvernig þær urðu til en litu líka á leirhveri á Hverarönd og í Leirhnjúki. Misgömul hraun voru líka skoðuð, Grjótagjá og gamli bærinn á Grænavatni.

Símenntunarmiðstöð Eyjafjarðar, Fisktækniskóli Íslands og MTR hafa sameinast um að bjóða upp á kennslu í fisktækni. Um þrjátíu nemendur eru að hefja námið þessa dagana. Kennslan fer fram á Dalvík en nemendurnir bætast í nemendahóp MTR. Þrír kennarar í jafn mörgum áföngum bætast í kennarahóp skólans. MTR ber ábyrgð á náminu.

Stóreflis beltagrafa var flutt á lóð skólans í dag og umsvifalaust hófst gröftur fyrir viðbyggingu. Verkið var boðið út og samdi Fjallabyggð við BB byggingar sem áttu lægsta boð, liðlega hundrað og tíu milljónir króna. Aðeins eru tíu dagar síðan Illugi Gunnarsson, mennta- og menningarmálaráðherra tók fyrstu skóflustungu að byggingunni.