Fréttir

Tinna Óðinsdóttir, fjarnemi við MTR, keppti á heimsbikarmótinu í áhaldafimleikum sem haldið var í Þýskalandi um nýliðna helgi. Tinnu gekk mjög vel, hún komst í úrslit í gólfæfingum og endaði í sjötta sæti. Hún stefnir að því að ljúka stúdentsprófi af íþróttabraut í MTR um jólin og læra síðan sjúkraþjálfun við háskólann í Árósum í Danmörku.

Innflytjendur hér á landi upplifa stundum fordóma og líka andstæðar væntingar heimamanna. Skilaboðin séu að þeir eigi að læra íslensku og tala hana en svo þegar þeir fari að æfa sig í daglegu lífi nenni ekki allir að hlusta og bíða eftir að þeir finni réttu orðin. Þetta kom fram hjá Aleksöndru Chilipala og Juan Camilo sem heimsóttu MTR í morgun og töluðu um væntingar fólks frá öðrum löndum sem vill búa á Íslandi. Bæði eru nýir Íslendingar og sérfræðingar í fjölmenningu.

Fjarmenntaskólinn og Fjölbrautaskólinn við Ármúla hafa samið um fjarnám í heilbrigðisgreinum. Stefnt er að því að bjóða fjarnám í læknaritaranámi, heilbrigðisritaranámi, tanntæknanámi, lyfjatækninámi og sjúkraliðanámi. Það eru bóklegir áfangar sem verða boðnir í fjarnámi en verklegir áfangar verða kenndir í lotum þar sem því verður við komið.

Nemendur eru beðnir um að meta aðstæður áður en þeir leggja af stað í skóla og hafa samráð við forráðamenn séu þeir undir lögaldri. Skólaakstur frá Dalvík og Siglufirði er ákvarðaður af bifreiðastjórum sem sem bera ábyrgð á akstrinum. Strætó frá Akureyri tekur sínar ákvarðanir. Aki þeir ekki er það tilkynnt á síðu skólans þegar við fáum þær fregnir. Sé talið að veður hamli för eða sé áhættusamt, en skólabifreiðar og Strætó keyra, eru nemendur beðnir að tilkynna það á skrifstofu skólans. Nemendur stunda námið heima þá daga sem ferðaveður er ekki og hafa samband við kennara í Moodle, eða með öðrum hefðbundnum samskiptaaðferðum, gerist þess þörf. Engum skilafrestum er breytt.

Í áfanganum Inngangur að listum er markmiðið að opna fyrir sköpunarkraft nemenda og gera þá óhrædda við að prófa, framkvæma og þróa hugmyndir sínar án þess að hræðast útkomuna. Nemendur skoðuðu í morgun og prófuðu hugbúnað og tæki sem notað er til að hanna og framleiða vörur og listmuni með geislaskurði.

Haukur Orri Kristjánsson, nemandi á félags- og hugvísindabraut í MTR hefur tekið sæti í nýstofnuðu ungmennaráði Menntamálastofnunar. Í ungmennaráði stofnunarinnar situr fólk á aldrinum 14-18 ára í samræmi við þann vilja hennar að taka tillit til skoðana ungs fólks og gera það að þátttakendum í ákvörðunum stofnunarinnar.

UN Women vinna að jafnrétti, mannréttindum kvenna og efnahagslegri og pólitískri valdeflingu þeirra en gegn ofbeldi. Kristjana Björk Barðdal, Unnur Lárusdóttir og Alexandra Van Erven, allar í stjórn Ungmennaráðs UN Women heimsóttu skólann fyrir helgi og kynntu þetta mikilvæga starf.

Þriðjudaginn 1. nóvember hefst innritun nýrra dagskólanemenda og fjarnema fyrir vorönn 2017. Stendur hún yfir til 19. desember. Nemendur sem ætla að stunda dagskólanám innrita sig á menntagatt.is en þeir sem vilja stunda fjarnám innrita sig á innritunarvef skólans.

Arnar Ómarsson heimsótti skólann í morgun og fjallaði um tækni og hvernig við notum tækni. Hann sýndi brot úr nýrri heimildarmynd HyperNormalisation sem Adam Curtis gerði fyrir BBC. Þar er fjallað um hvernig tölvukerfi hafa tekið yfir meira og meira af samfélaginu. Spurningin er hvort netið sé táknmynd – frelsi eða gildra og verið sé að búa til falska ímynd?

í gærkvöldi fluttu nemendur og kennarar skólans tónlist á Kaffi Klöru í Ólafsfirði. Fyrst sungu nemendur í kór skólans fjögur lög undir stjórn Lísebet Hauksdóttur og Rodrigo J. Thomas sem spilaði undir. Á eftir fluttu kennararnir nokkur lög. Við höfum yfirleitt horft á viðfangsefni nemenda í fréttum en að þessu sinni langar okkur að draga fram frábæran flutning kennaranna á sinni tónlist. Við erum auðug af hæfileikum hér í skólanum bæði meðal nemenda og kennara.