Fréttir

„Ég held að ég sé ekki tilbúin að kveðja skólann og yfirgefa þessa skemmtun“. Þetta upplýsir Erla Marý í grein í Framhaldsskólablaðinu. Hún segist hafa komist að því fyrir stuttu að hún gæti útskrifast um jólin en eftir miklar pælingar hafi hún ákveðið að láta það bíða vors vegna þess að skólalífið sé svo gott.

Frambjóðendur hafa verið duglegir að heimsækja skólann síðustu daga eins og gott er í aðdraganda kosninga. Þeir hafa verið áhugasamir um skólastarfið og jákvæðir í garð skólans. Hlustuðu og skoðuðu, settu sig inn í mál og spjölluðu við nemendur og starfsmenn.

Nemendur starfsbrautar gerðu sér dagamun í vikunni og brugðu sér í menningarferð til Siglufjarðar. Á Siglufirði er blómlegt menningarlíf og margt að sjá. Til að fá smá nasasjón af því sem þar er í gangi var ákveðið að fara á nokkra staði þó stoppað væri stutt á hverjum þeirra.

Fundur um forvarnir verður haldinn fyrir foreldra nemenda Grunnskóla Fjallabyggðar og Menntaskólans á Tröllaskaga nk. miðvikudag 19. október kl. 19.30 í Tjarnarborg, Ólafsfirði. Framsöguerindi flytur fíkniefnateymi Lögreglunnar á Norðurlandi eystra. Tökum höndum saman - fræðumst um forvarnir. Grunnskóli Fjallabyggðar Menntaskólinn á Tröllaskaga

Hægt er að túlka tónlist á táknmáli og æfði nemendahópur sig á því í miðannarvikunni. Bæði er textinn túlkaður með táknum en látbragð er einnig notað til að koma til skila tilfinningum sem bundnar eru við tónlistina. Almennt fannst nemendum efni táknmálsáfangans fróðlegt og skemmtilegt.

Smádýrasmiðja var eitt af námskeiðunum sem var boðið upp á miðannarvikunni. Fjallað var um gagn og tjón af smádýrum og bent á uppskriftir að mat úr skordýrum. Heimur smádýranna kynntur fyrir nemendum en síðan var þeim skipt í fjóra hópa sem unnu hver að sínum verkefnum.

Nemendur í tónlistaráfanga miðannarviku héldu líflega uppskeruhátið á Kaffi Klöru í gærkvöldi. Þar fluttu þau ábreiður frá ýmsum tónlistarmönnum, þar á meðal Sam Smith, Pink og Jessie J. Nemendur útsettu lögin sem þau fluttu sjálf og stóðu sig vel í því að mati kennara. Lokalag kvöldsins fluttu þau með Katrínu og var það með frumsömdum texta sem fjallaði um skólann.

Námið í áfanganum hófst á því að nemendur ræddu um heimsálfurnar og einstök lönd og tengdu nýlega atburði sem hafa verið í fréttum við staðina. Gömul merkileg mannvirki og dýralíf einstakra landsvæða bar einnig á góma og gerðu nemendur glærusýningar eða málverk til að túlka það sem þeir kynntu sér.

Hvað á að gera ef maður kemur að slysi? Hvernig fer endurlífgun fram og hvernig á að veita sálrænan stuðning? Um þetta er fjallað í námsáfanga í skyndihjálp í miðannarvikunni. Námið er bæði bóklegt og verklegt hjá Hörpu Jónsdóttur frá Rauðakrossinum

Fjölbreytt viðfangsefni einkenndu ferð átján nemenda, tveggja kennara og eins foreldris til Alicante á Spáni í síðustu viku. Dagskrá var þétt alla átta dagana. Nemendur greiddu ferðina sjálfir en söfnuðu einnig í ferðasjóð sem dugði fyrir ferðum með sporvögnum og strætisvögnum, nokkrum máltíðum og fleiru.