Fréttir

Gönguskíðaferð í Héðinsfirði á þriðjudag var hluti af fjögurra daga kennslu í skíðaíþróttum í þemavikunni. Sprækur hópur gekk yfir ísilagt Héðinsfjarðarvatn og að útfallinu. Skoðaðir voru allir skálar og eyðibýli á leiðinni. Veður var hið blíðasta framanaf en á leiðinni til baka var vindur á móti og slyddurigning þannig að þátttakendur reyndu á sjálfum sér að ganga í misjöfnu veðri. Björn Þór Ólafsson og Óliver Hilmarsson sáu um skíðagöngukennsluna.

Nemendur í áfanganum Sköpun völdu sér tvö ólík viðfangsefni og sköpuðu úr þeim nýtt líf/hlut. Hugarflugið var látið ráða ferð í samruna ólíkra hluta. Til dæmis runnu ólíkar dýrategundir saman í eina nýja eða ólíkir dauðlegir hlutir runnu saman og urðu að nýjum hlut, jafnvel runnu saman lifandi vera og dauðlegur hlutur.

Adolf Hitler og Osama bin Laden komu í heimsókn með föruneyti í morgun og sungu saman - um Gamla-Nóa. Þeir hlutu sælgæti að launum. Ekki fylgir sögunni hvort þeir félagar sýndu iðrun en í kaþólskum sið er öskudagurinn dagur iðrunar.

Verktakar sem eru að grafa fyrir nýrri álmu grunnskólans slitu ljósleiðarann í sundur og liggur Internetsamband til skólans niðri af þeim sökum. Þetta hefur ekki áhrif á vefinn þar sem hann er hýstur annarsstaðar en ekki er hægt að ná til Moodle fyrr en gert hefur verið við leiðarann. Viðgerðarmenn eru komnir á staðinn og eru að gera við. Vonum við að þetta lagist sem fyrst.

Skóla- og frístundaakstur verður með breyttu sniði mánudag 20. til miðvikudags 22. febrúar út af vetrarfríi Grunnskóla Fjallabyggðar.

Nemendur í Tröllaskagaáfanga fræddust um starf Ferðafélags Siglufjarðar hjá Guðrúnu Ingimundardóttur í morgun. Á myndinni sýnir hún atferli sem félagsmenn stunduðu á ferðalögum síðasta sumar og kallast “að planka”.

Hver er munurinn á töfrum og göldrum? Hvað er mana og hvert er eðli púka?

Alice Liu forstöðumaður Listhúss í Fjallabyggð og Marijke Appleman, listamaður frá Rotterdam í Hollandi voru gestir í Tröllaskagaáfanga í morgun. Marjike kom til Fjallabyggðar á sunnudaginn var þannig að segja má að Listhúsið hafi þar með tekið til starfa.

Nemendur í áfanga um úrgangslist sýndu afrakstur þemavinnu sinnar í skólanum í morgun. Þema sýningarinnar er sólin.

Sjávarútvegsfyrirtækið Ramminn í Fjallabyggð hefur gefið Menntaskólanum á Tröllaskaga fimm hunduð þúsund krónur til að efla starf skólans. Ólafur Marteinsson, framkvæmdastjóri Rammans afhenti gjöfina í skólanum í morgun.