Fréttir

Nemendur í 10. bekk Grunnskóla Fjallabyggðar komu í heimsókn í Menntaskólann á Tröllaskaga. Gestirnir vildu vita hvað væri kennt í skólanum og hvernig námið færi fram. Farið var í tíma og nemendur menntaskólans sögðu þeim hvernig félagslífið væri og hvernig þeir lærðu. Nemendur sem hyggja á iðnnám sem ekki er í skólanum, vildu vita hvort nám sem lokið væri í MTR væri metið í öðrum skólum þannig að þeir gætu hafið námið hér en haldið áfram á öðrum stað. Svarið við þessu síðasta er skýrt, allt nám sem nemendur hafa lokið í MTR er metið í öðrum framhaldsskólum.

Mikilvægt er í kjölfar þess áfalls sem hefur orðið í Fjallabyggð er að einstaklingar styðji hvern annan og leiti hjálpar. Fjöldahjálparstöð Rauða kross deildar Siglurfjarðar er opin laugardag og sunnudag kl. 14-17.  Bæklingurinn Aðstoð við börn eftir áfall getur verið góð lesning bæði fyrir aðstandendur og nemendur sjálfa. Nemendur eru hvattir til að ræða við starfsmenn skólans ef þeir eiga erfitt með að sitja kennslustund eða einbeita sér að námi vegna atburðanna. Einnig geta þeir leitað til námsráðgjafa sjá viðtalstíma og á heilsugæslustöðinni í Ólafsfirði á Hornbrekku og Siglufirði á sjúkrahúsinu.

Í áfanganum “inngangur að náttúruvísindum” læra starfsbrautarnemar meðal annars að nota mælitæki á borð við hitamæla, vogir og málbönd. Miðvikudaginn 9. nóvember reyndist lofthiti vera 4°, vatnshiti í Tjörninni við Tjarnarborg var 5° en sjávarhiti var 6°. Síðasta mælingin kom nemendum verulega á óvart, þeir höfðu fyrirfram búist við að sjórinn væri bæði kaldari en loftið og vatnið í Tjörninni.

Nútíminn verður að fortíð og til að tryggja að menning framhaldsskólanema glatist ekki er hafin á vegum Þjóðminjasafns Íslands söfnun á upplýsingum um líf og starf framhaldsskólanema. Meðal annars er spurt um vígslu nýnema, um dansleiki og félagsstarf og um daglegt líf svo sem hvað gert sé í frímínútum og hvernig sætaskipan sé í kennslustofum. Þjóðminjasafnið óskar eftir liðveislu nemenda Menntaskólans á Tröllaskaga við þetta verkefni.

Tveir nemendur MTR, Gísli Hvanndal Jakobsson og Sigurlína Káradóttir, hafa hannað grunnáfanga í kvikmyndagerð og verður hann kenndur á vorönn ef næg þátttaka fæst. BÍÓ-áfanginn varð til sem verkefni í Tröllaskagaáfanganum og þróaðist þar frá fyrstu hugmynd þar til námslýsing lá fyrir og kennari hafði fundist. Nemendur eru minntir á að ganga frá skráningu sinni á vorönn sem fyrst. Síðasti dagur til að skrá sig er 1. nóvember.

Golf var meðal þeirra íþrótta sem nemendur gátu kynnst í þemavikunni. Áhugi var mikil enda kennarinn vanur golfari og nemendum að góðu kunnur Björg Traustadóttir, sem venjulega sér um bókasafn skólans, annast ræstingu og fleira.

Róður er einhver allra hollasta íþrótt sem hægt er að stunda. Í þemaviku nutu nokkrir nemendur þess að róa kajak um spegilslétt Ólafsfjarðarvatnið.  Myndir

Fátt jafnast á við að svífa á brimbretti eftir brattri öldunni. Í þemaviku notuðu nokkrir nemendur tækifærið og reyndu þessa skemmtun. Blautbúningar komu í veg fyrir að mönnum yrði kalt og það var sannarlega fjör í fjörunni.   Myndir

Innritunartímabil fyrir vorönn 2012 hefst 1. nóvember og lýkur 22. nóvember n.k. Innritun fer fram á Menntagatt.is.

Í Framhaldsskólanum í Austur Skaftafellssýslu, FAS, vinna nemendur að því að koma á sjálfbæru og lýðræðislegu félagslífi. Forystufólk í félagslífi nemenda er á hringferð um landið að kynna sér félagslíf í framhaldsskólum. Hópurinn kom í MTR og átti meðal annars fund með Lindu og Atla frá Trölla. Linda segir að þetta hafi verið lærdómsríkar samræður þar sem fulltrúar félaganna hafi skipst á upplýsingum. Fram hafi komið að félagslíf í FAS sé byggt upp á klúbbastarfi. Gestirnir hafi hrifist mjög af MTR og boðið fulltrúum Trölla að endurgjalda heimsókina.