Fréttir

Forráðamenn nemenda yngri en 18 ára geta fengið aðgang að Innu. Þeir sækja sér lykilorð á www.inna.is í gegnum „gleymt lykilorð“ (sjá lýsingu hér að neðan) og fá sent nýtt lykilorð á netfang forráðamanns sem skráð var í Innu þegar sótt var um skólann. Forráðamaður notar eigin kennitölu. Gleymt lykilorð Nemandi sem hefur týnt lykilorði sínu, svo og forrráðamaður nemanda yngri en 18 ára, geta sótt sér lykilorð að Innu. Lykilorðið er sent á netfangið sem skráð er í Innu. 1. Smellt er á tengilinn "Gleymt lykilorð" til hægri á innskráningarsíðu Innu, www.inna.is. 2. Kennitalan er slegin inn og MTR valið. 3. Inna sendir sjálfkrafa notendanafn (nota má hvort heldur er notendanafnið eða kennitöluna) og lykilorð í tölvupósti á það netfang sem skráð er í Innu.

Landgræðsla ríkisins færði Menntaskólanum á Tröllaskaga bókina Sáðmenn sandanna, Saga landgræðslu á Íslandi 1907-2007 að gjöf í tengslum við Dag íslenskrar náttúru sem er í dag.  Bókin hlaut verðlaun Félags bókasafns- og upplýsingafræða árið 2007 sem besta fræðibók ársins. Höfundur bókarinnar er Ólafsfirðingurinn Friðrik G. Olgeirsson sagnfræðingur. Hann segir á heimasíðu sinni um æskuárin í Ólafsfirði "Ég ólst upp í Ólafsfirði og þar byrjaði ég á unglingsárunum að vinna við fiskvinnslu og almenn verkamannastörf hjá sveitarfélaginu. Þá stundaði ég sjómennsku í tvö sumur. Þetta var góður grunnur og mikilvægur." Bókin er fengur fyrir skólann og mun nýtast nemendum sem heimild um landgræðslustarfið og auka skilning á mikilvægi verndar og uppbyggingar jarðvegs og gróðurs. Einnig er hún góður vitnisburður um hæfileika og afrek heimamanns á sviði hugvísinda. (Mynd af heimasíðu Friðriks)

Í ratleik um náttúrulegt umhverfi skólans og miðbæ Ólafsfjarðar tókust nemendur frækilega á við þungar þrautir. Bæði reyndi á spretthörku til að koma sér á milli staða og kunnáttu í ensku því vísbendingar voru á því máli. Önnur ferð var tileinkuð fuglaskoðun og ljósmyndun en nemendur ætla að semja sögu og skreyta hana með myndunum. Samþætt nám í umhverfisfræði, ljósmyndun, íslensku, ensku og hreyfingu á degi íslenskrar náttúru. Myndir 

Hjörleifur Hjartarson, verkefnisstjóri í Náttúrusetrinu á Húsabakka í Svarfaðardal heimsótti skólann í vikunni og greindi frá starfinu í setrinu. Hann vonast til þess að það geri fólk að meiri náttúruverndarsinnum að skoða sýninguna Friðland fuglanna sem opnuð var í vor. Heimsókn í setrið ætti líka að verða til þess að menn gangi betur um náttúruna eftir en áður.

Nemendur á listabraut nutu frásagna ljósmyndarans af aðferðum sínum og vinnu með frumbyggjum á norðurslóðum. Á bátahúsi Síldarminjasafnsins er sýning á myndum sem Fiann Paul tók á Grænlandi en hann hefur líka myndað konur á Vestfjörðum við brjóstagjöf. Fiann er afreksmaður í róðri og hefur keppt fyrir Íslands hönd.

Íris Sigurjónsdóttir, forstöðumaður Byggðasafnsins Hvols á Dalvík, var gestur í Tröllaskagaáfanga. Frásögn hennar af kjól sem hún forvarði vakti mesta athygli nemenda. Kjóllinn var gerður af góðum efnum fyrir um 150 árum. Hann er til sýnis í safninu og þar er saga forvörslu hans rakin.

Já, það er vel varðveitt leyndarmál að í Ólafsfirði eru ágætar aðstæður til að renna sér á brimbretti. Óliver Hilmarsson, kennari á  náttúruvísindabraut náði góðri öldu á föstudaginn.

Örlygur Kristfinnsson í Síldarminjasafni Íslands greindi nemendum frá því hvernig hugmyndin að safninu varð að veruleika. Hann lýsti líka framtíðarsýn safnsins í fróðlegum fyrirlestri. Hann reiknar með að gestir Síldarminjasafnsins verði um tuttugu þúsund í ár en í fyrra voru þeir um tólf þúsund.  Myndir  

Minnum á kynningarfund fyrir foreldra og forráðamenn sem haldinn verður í skólanum fimmtudaginn 8. september kl. 20:00.      Foreldrum og öðrum aðstandendum nemenda skólans gefst þar kostur á að kynnast skólastarfinu og ræða við starfsmenn. Þá verður kosin stjórn foreldrafélags skólans sem stofnað var s.l. vetur.     Lög Foreldrafélags MTR

Í morgun komu nokkrir nemendur og kennari þeirra saman með hljóðfærin og tóku létt djamm. Þetta verður héðan í frá fastur liður í fundatímanum á miðvikudögum, frá 10:50 til 11:50. Vonandi til gleði og andlegrar upplyftingar fyrir spilamenn og þá sem heyra tónana. Meira af myndum hér