Fréttir

Lilja Björk Jónsdóttir hefur tekið við sem formaður Nemendafélagsins Trölla af Guðna Brynjólfi Ásgeirssyni. Hann brautskráist frá skólanum á fimmtudaginn kemur. Formannaskiptin fóru fram við hátíðlega athöfn á jólaskemmtun skólans og þar voru Guðna Brynjólfi þökkuð vel unnin störf.

Óliver náttúrufræðikennari fékk verkefni við hæfi þegar Björg ræstitæknir fann hagamús undir skrifborði Ingu stærðfræðikennara. Einhvern veginn hefur músin reiknað út að þetta væri góður staður því ljóst var af ummerkjum að hún hafði haldið þarna til um hríð. Ákveðið var að sleppa músinni á lóð skólans og gefa henni færi á að spjara sig í náttúrulegu umhverfi.

Vel á þriðja hundrað gestir sáu haustsýningu skólans á laugardag. Sýndur er afrakstur vinnu nemenda í myndlist, listljósmyndun, upplýsinga- og tæknimennt og ensku auk þess sem nemendur starfsbrautar kynntu nýútkomið blað sitt. Ballöður, valsar og gítardúettar tónlistarnema hljómuðu í bakgrunni. Sýningin verður opin til 20. desember á þeim tíma sem skólinn er opinn.

Jólaskemmtun MTR 2012 sem var haldin á föstudagskvöldið tókst sérlega vel. Salurinn í Tjarnarborg var fagurlega skreyttur, maturinn frá Bautanum gældi við bragðlaukana og hljómsveitin 1860 sló hreinlega í gegn. Aðgöngumiðarnir giltu einnig sem happdrættismiðar og þeir gestir sem höfðu heppnina með sér fengu fyrsta jólapakkann um kvöldið. Nemendaráð annaðist undirbúning hátíðarinnar.

Undirbúningur fyrir sýningu á verkum nemenda á haustönn er á lokastigi. Verið er að leggja síðustu hönd á sum listaverkin og önnur bíða eftir því að verða hengd upp. Auk myndverka sýna starfsbrautarnemendur blað sitt sem út kom í morgun og nemendur í upplýsinga- og tæknimennt og ensku sýna myndbönd, meðal annars um heimabæina okkar Dalvík, Ólafsfjörð og Siglufjörð.

Nemendur á starfsbraut fögnuðu því í morgun að blað þeirra, Tröllafréttir, er komið út. Blaðið var unnið í fjölmiðlaáfanga á haustönninni. Efni þess er fjölbreytt enda áhugamál nemenda margvísleg. Þeir fjalla um skólann og um vinnuna sína en einnig um íþróttir, veiði, tækni, bíla, skip stjörnur himins og fleira.

Alexía María Gestsdóttir, nemandi á náttúruvísindabraut, keppir í alpagreinum á Ólympíuhátíð Evrópuæskunnar í Brasov í Rúmeníu í febrúar. Alexía æfir á Dalvík og er Björgvin Hjörleifsson þjálfari hennar. Hún hefur yfirleitt verið best í svigi og stórsvigi í sínum aldursflokki í Ólafsfirði. Alexía segist þurfa að fara að setja allt á fullt í æfingunum en hún fór í aðgerð á hné í haust og er ekki alveg búin að ná sér. Tólf íslenskir unglingar, fæddir 1995 og 1996 fara til keppni í Brasov, sex stúlkur og sex strákar. Átta keppa í alpagreinum en fjórir í göngu.

Sveitarstjórn Grýtubakkahrepps kom í skólann í gær ásamt sveitarstjóra sínum Guðnýju Sverrisdóttur. Grýtubakkahreppur er eitt af þeim sveitarfélögum sem stendur dyggilega að baki skólanum og sérstaklega ánægjulegt að fá þau í heimsókn. Skoðuðu þau skólann, fræddust um uppbygginu hans og starfsemi hjá skólameistara. Sýndu þau skólanum sínum mikinn áhuga og fóru ánægð heim í sína fallegu sveit.

Opið er fyrir umsóknir um nám við skólann til 12. desember, sótt er um í gegnum vefinn http://menntagatt.is/. Smellið á Lesa meira til að sjá áfanga í boði

Hægt er að stunda fjarnám við Menntaskólann á Tröllaskaga á næstu önn í ýmsum áföngum, upplýsingar má finna undir Námið eða með því að smella á Lesa meira