Fréttir

Lífsorkan ólgar í Ólafsfirði þegar fullur máninn sáldrar silfri á fjöllin. Sumir trúa því að tíðni fæðinga, slysa og ofbeldis aukist á fullu tungli en líklega eru það hindurvitni. Hins vegar stendur fullt tungl fyrir það að ljúka hlutum og núna styttist í að við ljúkum haustönninni.

Snjó hefur kyngt niður í Ólafsfirði síðustu daga. Útikennslustofan þar sem nemendur æfðu sig í impressioniskri sköpun fyrir tveimur vikum er komin á kaf og ekki dygði neinn smámokstur til að koma henni aftur í gagnið. En snjóalögin geta tekið á sig listræn form og spurning hvort nemendur á listabraut geta nýtt sér þau til frjórrar sköpunar.

Ákveðið hefur verið að kenna grunnþjálfun björgunarmanna á vorönn í samstarfi við björgunarsveitir á svæðinu og Björgunarskóla Slysavarnarfélagsins Landsbjargar. Björgunarmaður 1 er áfanginn sem menn fá út úr þessu námi. Kennarar verða leiðbeinendur Björgunarskólans, flestir af Norðurlandi. Ásdís Sigurðardóttir, íþróttakennari mun sjá um skipulag námsins innan skólans.

Starfsbrautarnemendur hafa á haustönninni undirbúið gerð stuttmyndar þar sem bræðurnir frá Bakka í Svarfaðardal verða í lykilhlutverki. Handrit er tilbúið og tökur hófust á Siglufirði í gær. Á starfsbrautinni eru nemendur frá Dalvík, Ólafsfirði og Siglufirði og verður myndin tekin í öllum byggðarlögunum þremur.

Nemendur í Inngangi að listum lærðu margt í menningar- og listaferð sinni til Akureyrar í gær. Nemendur skoðuðu hvern krók og kima í Listagilinu. Fyrsti viðkomustaður var Ketilhúsið þar sem stendur yfir sýningin Ars Borealis. Hún veitir innsýn í líf á norðurslóðum fyrr og nú.

Vegna þess að engin kennsla verður í Grunnskóla Fjallabyggðar verður akstur á milli Siglufjarðar og Ólafsfjarðar með breytt sniði til og með þriðjudagsins 20. nóvember, hægt er að sjá aksturstöfluna með því að smella á Lesa meira

Skólaakstur féll niður í dag vegna óveðurs og flestir nemendur eru væntanlega heima hjá sér að læra. Einn og einn hefur þó komið í skólann og sinnt námi þar. Ástþór Árnason kom til dæmis eftir hádegið og lærði íslensku og Hrönn Helgadóttir lét sig hafa það að fara út og mála impressioniskt verk á skólalóðinni þrátt fyrir óhagstætt verður.

Fjallabyggð og Dalvík hafa fellt niður skólaakstur niður í dag vegna veðurs og versnandi veðurútlits. Í ljósi þess að samgöngur verða ótryggar í dag höfum við ákveðið að fella niður kennslu en nemendur læra sjálfstætt skv. áætlun og upplýsingum í kennslukerfinu Moodle. Nemendum er velkomið að koma í skólann og læra en hvattir til að leggja ekki af stað lengri leiðir í óvissu um hvort þeir komist aftur heim

Nemendur listnámsbrautar opna á morgun föstudag sýningu í Menningarhúsinu Bergi á Dalvík. Sýndur verður afrakstur verkefnis þar sem unnið var með þemað “skuggar”. Sýningin verður opnuð klukkan sextán á morgun og verður opin til 18. nóvember. Allir eru velkomnir á meðan Berg er opið.

Hægt er að taka stöðupóf á vegum mennta- og menningarmálaráðuneytisins í Menntaskólanum við Hamrahlíð í lok nóvember og byrjun desember.