Fréttir

Fimmtudaginn 15. febrúar fengum við tvo unga tónlistarmenn úr Fjallabyggð í heimsókn í skólann og glöddu þeir nemendur og starfsfólk í matarhléinu með ljúfum tónum. Þetta voru tvíburabræðurnir Júlíus og Tryggvi Þorvaldssynir sem hafa vakið töluverða athygli að undanförnu fyrir vandaðan söng og gítarleik. Þeir eru í 9. bekk Grunnskóla Fjallabyggðar auk þess að stunda tónlistarnám við Tónlistarskólann á Tröllaskaga og hafa komið víða fram undanfarna mánuði. Þeir komu m.a. fram á svæðistónleikum Nótunnar á Norður- og Austurlandi, sem fram fór á Akureyri á dögunum og var atriði þeirra eitt af þeim sem hrepptu þátttökurétt á lokahátíð Nótunnar sem fram fer í Hörpu 4. mars nk. Bræðurnir hafa komið fram á ýmsum skemmtunum í Fjallabyggð að undanförnu og fyrir stuttu hituðu þeir upp fyrir hljómsveitina Ný Dönsk þegar hún hélt tónleika á Kaffi Rauðku á Siglufirði. Á næstu vikum mun fleira listafólk af svæðinu láta ljós sitt skína í skólanum, nemendum og starfsfólki til yndisauka.

Hægt er að nota ýmsa tækni til að kenna nemendum í fjarskanum í lýðheilsuáföngum. Lísebet Hauksdóttir, íþróttakennari hefur kosið að nota „sportstracker“ appið. Hún telur að það sé frábær leið fyrir nemendur sem leiðist í íþróttum eða ráða illa við að vera í hóp. Innbyggt er að veita hrós og gefa nemendum þá tilfinningu að þeir séu hluti af heild. Þeir geta valið tegund hreyfingar, til dæmis göngu, hjólreiðar, skíði, hreyfingu í ræktinni eða reiðtúr. Í forritinu kemur fram fjöldi skrefa og kílómetra, meðal- og hámarkshraði, ásamt púls og yfirlitsmynd yfir leiðina sem farin var þannig að þetta gengur mjög vel. Nemendur senda síðan upptöku úr tækinu til kennara og fá hreyfinguna metna. Lísebet segir að margir nemendur haldi áfram að nota tæknina eftir útskrift og séu að senda sér myndir og upplýsingar úr „sportstracker“ af því sem þau eru að gera.

Undirbúningur ellefu nema fyrir næsta áfanga í erlenda samstarfsverkefninu um sjálfbærni og valdeflingu er í fullum gangi. Lagt verður af stað á föstudag og komið heim tíu dögum síðar. Samstarfsaðilar eru framhaldsskólar á Lanzarote, einni Kanaríeyja og á Ítalíu. Íslendingar og Ítalir ferðast til Lanzarote í þessum áfanga verkefnisins og njóta gestrisni heimamanna þar. Markmiðið er að sjá og skoða sem mest af því sem ferðaþjónusta á eynni býður gestum. Spurningin er - hvers njóta ferðamenn þar? Flestir MTR nemar gista hjá fjölskyldum og hafa þegar hafið samskipti við gestgjafa sína. Samstarfsaðilarnir á Lanzarote hafa undirbúið komu gestanna mjög vandlega og greinilega hugsað fyrir flestu. Almenningssamgöngur eru til dæmis lélegar á eynni og hafa gestgjafarnir því útvegað bílaleigubíla til að komast á milli staða. Sérstakir bolir hafa líka verið hannaðir fyrir þátttakendur. Ferðareglur hópsins frá MTR eru fimm og er þar efst á blaði að allir séu jákvæðir, haldi hópinn, sýni kurteisi og tillitssemi og láti strax vita ef eitthvað bjátar á. Verkefnið tekur tvö ár og er þema þess að finna leiðir til að efla nemendur til að takast á við framtíðina í hörðum heimi. Allir þátttakendur eru af landsbyggðinni í heimalöndum sínum og munu ef að líkum lætur þurfa að skapa eigin tækifæri til framfærslu í heimabyggð. Vinnan tengist meðal annars vistvænni ferðaþjónustu, listum og íþróttum. Hugmyndin er „samstarf við þróun viðskiptahugmynda sem geta veitt lífsviðurværi í sjálfbærum samfélögum á ólíkum stöðum“. Tilgangurinn er að auka líkur á að ungt fólk skapi sér framtíð í heimabyggð. Erasmusstyrkur að upphæð ellefu milljónir króna fékkst til verkefnisins og því er stýrt af starfsmönnum MTR.

Einhyrningar, kettir og uglur hafa heimsótt skólann í dag. Einnig ofurmenni, gamlar konur, sjóræningjar, galdramenn og uppvakningar. Allir syngja og fá sætindi að launum. Ýmsar áherslur má greina í lagavali. Gamli Nói heldur velli en lítt hefur að þessu sinni heyrst af Bjarnastaðabeljunum sem stundum hafa verið ofarlega á lista. En það var sungið glaðlega um sólina sem menn vilja láta skína á sig og franska barnalagið Alouette hljómaði fagurlega.

Á miðvikudag, fimmtudag og föstudag í þessari viku breytist áætlun skólabíla milli Siglufjarðar og Ólafsfjarðar vegna skipulagsdags og vetrarfrís í Grunnskóla Fjallabyggðar. Nemendum MTR er vinsamlega bent á að kynna sér breytingarnar með því að skoða linkinn sem birtist þegar smellt er á fréttina.

Sex nemendur sem stunda nám í Fjallamennsku við Framhaldsskólann í Austur-Skaftafellssýslu (FAS) á Hornafirði hafa þessa vikuna verið í fjallaskíðakennslu í MTr. Um er að ræða samstarfsverkefni milli FAS og MTR um fjallaskíðakennslu nemendanna, þar sem náttúra svæðisins býður upp á mikla möguleika til fjallaskíðunar ásamt því að MTr á búnað til kennslunnar. Tómas Atli Einarsson hefur séð um kennsluna sem að mestu leyti hefur verið verkleg.

Þrír sérfræðingar úr Tækniskólanum hafa notað daginn til að kynna sér starfið í MTR. Þetta eru Guðrún Randalín Lárusdóttir, skólastjóri Upplýsingatækniskólans, Nanna Traustadóttir, verkefnisstjóri K2 stúdentsbrautarinnar og Ólafur Sveinn Jóhannesson, deildarstjóri markaðs- og kynningarmála. Þau segjast hafa komið til að læra um nútímalega kennsluhætti og skipulag í skólastarfinu. Lára skólameistari sýndi skólann og sagði frá starfinu en þremenningarnir hittu líka kennara og nemendur. Þórarinn útskýrði til dæmis hvernig við bærum okkur að við vendikennslu og hvernig vinnutímafyrirkomulagið virkaði. Nemendur greindu m.a. frá skipulagi, félagslífi og framtíðaráformum sínum. Gestirnir sýndu áhuga á samtvinnun áfanga og óhefðbundnum kennsluháttum. Þau segja að Tækniskólinn sé að taka skref til framtíðar, til dæmis á K2 brautinni, aukin áhersla sé á að vinna í lotum og þjálfa nemendur í að vinna verkefnamiðað. Námið er skipulagt í samstarfi við Háskólann í Reykjavík og leiðandi tæknifyrirtæki. Lokaverkefni tengjast kjarnagrein á önn og eru skipulögð með þátttöku og stuðningi atvinnufyrirtækja á borð við CCP og Stúdíó Sýrland. Gestirnir höfðu í lokin orð á því að MTR virtist vera lýðræðislegur vinnustaður þar sem kennarar nytu mikils frelsis.

Það er hluti af námi í listgreinum að fylgjast með sýningum og öðrum atburðum. Nemendur í áfanganum inngangur að listum fóru í Listhúsið í Ólafsfirði í gær með Karólínu Baldvinsdóttur kennara sínum. Síðustu tíu daga hefur verið af ýmsu að taka hér í Ólafsfirði enda staðið yfir Skammdegishátíð. Fjöldi listamanna, bæði heimamanna og gesta frá öðrum löndum og heimsálfum, hefur framið gjörninga og staðið fyrir tónlistarviðburðum og listsýningum af ýmsu tagi. Þrír listamenn kynntu verk sín og annarra fyrir áhugasömum nemendum í gær. Verkin voru fjölbreytt og hafði eitt til dæmis verið gjörningur Jakubs Janco frá Slóvakíu, í fjörunni á Ósbrekkusandi á Skammdegishátíðinni. Nemendum þótti einnig athyglisverð verk eftir ungt fólk í Ástralíu, bæði listnema og áhugafólk, sem Shasta Stevic sýningarstýra hafði safnað saman og sett upp í Listhúsinu.

Lilja Bjarnadóttir, kennaranemi við Háskólann á Akureyri tekur sex vikur í vettvangsnámi og æfingakennslu í MTR á vorönninni. Lilja býr á Dalvík og er að afla sér kennsluréttinda í framhaldsskóla. Hún er umhverfisverkfræðingur frá danska tækniháskólanum og vann í umhverfisdeild Landsvirkjunar áður en hún hóf kennaranámið. Lilja segist hafa valið MTR vegna spennandi og nýstárlegra kennsluaðferða og skipulags skólans sem hún hafi heyrt vel látið af. Hún situr í tímum þar sem nemendur eru mest að vinna sjálfstætt í verkefnum vikunnar og það sé mjög áhugavert. Vel hafi verið tekið á móti sér og skólinn sé heimilislegur. Hún gerir ráð fyrir að kenna stærðfræði og náttúruvísindagreinar svo sem umhverfisfræði og jafnvel efna- og eðlisfræði í framtíðinni. Leiðbeinandi Lilju er Unnur Hafstað kennari í stærðfræði og raungreinum.

Ákveðið var í MTR í haust að hefja þátttöku í verkefninu Græn skref í ríkisrekstri. Skólinn hefur nú tekið fyrsta skrefið og fengið það vottað og viðurkennt. Hólmfríður Þorsteinsdóttir, sérfræðingur hjá Umhverfisstofnun kom og skoðaði sérstaklega flokkunarmál og innkaup með tilliti til þess hvort keyptar væru vistvænar hreingerningavörur og pappír. Skilyrði er að nota umhverfisvottaðar vörur. Athugasemd var gerð við flokkun hjá nemendum og í almannarýminu. Gera þarf úrbætur sem Nemendafélagið þarf að koma að en því sem að var fundið verður snarlega kippt í liðinn. Markmið verkefnisins Græn skref í ríkisrekstri eru að efla vistvænan rekstur á kerfisbundinn hátt. Byggt er á grænum skrefum Reykjavíkurborgar, verkefni sem hófst haustið 2014. Nokkrar stofnanir umhverfis- og auðlindaráðuneytis hafa tekið þátt í að aðlaga verkefnið að ríkisrekstri. Tilgangurinn er að hafa jákvæð áhrif á umhverfið, bæta ímynd og starfsumhverfi stofnana og draga úr kostnaði. Sjá nánar hér: http://graenskref.is/um-verkefnidh Tengiliður verkefnisins í MTR er Unnur Hafstað en við framkvæmdina reynir mest á Björgu Traustadóttur, Gísla Kristinsson og Jónínu Kristjándóttur, sem sjá um rekstur, innkaup og þrif hússins. Þau eru með Hólmfríði Þorsteinsdóttur á myndinni, sem tekin var þegar viðurkenningin fyrir fyrsta skrefið var afhent.