Fréttir

Íþróttatíma starfsbrautar var breytt í náttúruskoðun í morgun þegar fréttist af óvenjulegum reka á Ósbrekkusandi. Í ljós kom að rekið hafði dauðan beinhárkarl. Hræið er af stærðarskepnu, um sjö metra langri. Rotnun er tæplega hafin og engin lykt af hræinu. Nemendum fannst hræið áhugavert og flestir voru að sjá slíkt í fyrsta sinn. Þeir skoðuðu hákarlinn í krók og kring og prófuðu að hoppa á honum. Kom fram sú tillaga að nota hræið sem ærslabelg við skólann. Þá hafði einn nemandinn orð á því að ekki þyrfti að hafa áhyggjur af hráefnisskorti í nýja mötuneytinu. Veður er einkar blítt í Ólafsfirði og nutu nemendur útivistarinnar í fjörunni við þessa óvenjulegu náttúruupplifun.

Miðvikudaginn 30. ágúst 2017 kl. 17:00 verður haldinn foreldrafundur í Hrafnavogum í húsnæði Menntaskólans á Tröllaskaga. Þar gefst foreldrum tækifæri til að kynnast skólanum, koma með spurningar og ræða við kennara.

Vígsla nýbyggingar við skólann var einkar ánægjuleg athöfn. Kristján Þór Júlíusson, mennta- og menningarmálaráðherra sagði í ávarpi sínu að Menntaskólinn á Tröllaskaga væri samfélaginu við utanverðan Eyjafjörð mjög mikilvægur. Frá upphafi hafi frumkvæði og sköpun einkennt skólastarfið, haft áhrif bæði nær og fjær og verið mörgum fyrirmynd. Góð útkoma skólans í könnuninni „stofnun ársins“ sýndi ánægju starfsfólks. Könnun ráðuneytis hefði sýnt veikleika í félagslífi nemenda og skort á mataraðstöðu fyrir þá og starfsmenn. Nýi salurinn myndi bæta úr þessu, bæði yrði þar félagsaðstaða nemenda og mötuneyti. Gunnar Ingi Birgisson, bæjarstjóri stýrði athöfninni. Steinunn María Sveinsdóttir, formaður bæjarráðs þakkaði öllum sem að framkvæmdinni komu en Lára Stefánsdóttir, skólameistari ræddi mikilvægi bættrar aðstöðu og gaf salnum nafnið Hrafnavogar. Kristján Þór og Kristinn G. Jóhannsson, listmálari klipptu svo á borða og opnuðu salinn formlega.

Skólinn festi í sumar kaup á sápuboltavelli og hefur hann þegar sannaði gildi sitt sem leik- og skemmtitæki. Sápuboltamót var haldið 15. júlí og tókst með miklum ágætum, eins og meðfylgjandi myndir sýna. Þeir sem skipulögðu mótið og sáu um það að öllu leyti eru flestir gamlir nemendur skólans. Þátttakendur voru líka flestir núverandi eða fyrrverandi nemendur. Hópurinn sem skipulagði mótið hefur tekið að sér að gæta vallarins og sjá um uppsetningu í samstarfi við íþróttakennarana. Hugmyndin er að völlurinn nýtist til að auðga líf nemenda í MTR og Grunnskóla Fjallabyggðar með sameiginlegum viðburðum. Næsta mót gæti orðið síðar í þessum mánuði eða fyrri hluta septembermánaðar.

Hátíðleg athöfn verður í skólanum á föstudag þegar tekin verður formlega í notkun ný bygging við skólann. Framkvæmdir hafa staðið í eitt ár og eru iðnaðar- og verkamenn að leggja síðustu hönd á fráganginn. Aðstaða nemenda mun batna mjög með tilkomu stækkunarinnar. Þar verður mötuneyti og ýmis aðstaða fyrir félagslíf nemenda og sýningar.

Menntaskólinn á Tröllaskaga var settur í áttunda sinn í morgun. Í skólann eru skráðir nær þrjú hundruð og sjötíu nemendur, þar af um eitt hundrað staðnemar. Þeir þurfa að venjast því að vinna með fólki sem statt er annars staðar og þeir sjá ef til vill aldrei. Bæði nemendum og starfsmönnum hefur fjölgað frá síðasta skólaári. Mörg samstarfsverkefni við erlenda skóla eru í gangi eða að hefjast og nemendur geta valið úr möguleikum til að taka þátt í áhugaverðum áföngum og ferðast til annarra landa. Lára Stefánsdóttir, skólameistari hvatti nemendur til þess í morgun að nýta þessi tækifæri til að skilja heiminn betur.

Að venju setti undirbúningur skólastarfsins í vetur svip á sérstaka vinnudaga kennara í upphafi haustannar. Einnig var nokkrum tíma varið til að ræða stöðu fjölmargra samstarfsverkefna við skóla í öðrum löndum. Þá var hugarflug í sambandi við undirbúning alþjóðlegu ráðstefnunnar EcoMedia 2018 sem MTR skipuleggur og heldur í Fjallabyggð í október á næsta ári.

Menntaskólinn á Tröllaskaga verður settur í Tjarnarborg, föstudaginn 18. ágúst kl. 8:10 og öllum velkomið að mæta þar. Að setningu lokinni hitta nemendur umsjónarkennara sína en að því búnu hefst kennsla samkvæmt stundaskrá. Stundaskrá verður í Innu og nemendum bent á að glöggva sig á henni. skólabyrjun verður í vetur kl. 8:10 og verður skólaakstri breytt til samræmis við það. Akstur frá Siglufirði kl. 07:40 og Dalvíkurbyggð 7:50. Nýtt húsnæði verður tekið í notkun þann 25. ágúst n.k.

Nú eru starfsmenn komnir úr fríi og byrjaðir að svara erindum sem bárust á meðan á leyfum stóð. Búið er að fara yfir greiðsluseðla og gert ráð fyrir að þeir sem ekki hafa greitt ætli ekki að koma í skólann í haust og byrjað að taka umsækjendur inn af biðlistum í þeirra stað. Þeir sem bíða upplýsinga um hvort þeir komast inn í skólann ættu því að fá svör á næstu dögum. Ef áform einhverra hafa breyst og þeir ætla ekki að mæta í skólann í haust eru þeir beðnir að láta vita sem fyrst þar sem aðsókn er mikil.

Allir nemendur ættu að vera komnir með greiðsluseðil vegna innritunargjalda fyrir haustönn 2017 í heimabanka. Greiðsluseðlar munu einnig verða sendir út. Með greiðslu staðfesta nemendur skólavist sína. Ógreiddur reikningur þýðir að nafn nemanda verður tekið af nemendalista skólans og hann fær þar með ekki skólavist á haustönn. Þetta á einnig við um fjarnema. Fjarnemum er bent á að greiða greiðsluseðilinn í banka ekki heimabanka þurfi þeir kvittun fyrir innritunargjöldum fyrir verkalýðsfélag.