Fréttir

Nemendur og kennarar í áfanganum Matur og menning heimsóttu Rauða krossinn í dag og elduðu sýrlenskan mat. Tvær konur úr hópi flóttamanna Fayrouz og Joumana stýrðu þessu með Helen, sjálfboðaliða á Akureyri. Yngsti sonur Fayrouz, Abdul, tveggja mánaða var einnig með og bræddi nokkur hjörtu. MTR-liðið var aðeins á undan áætlun og fékk því stutta kynningu á starfi Rauða krossins í Eyjafirði áður en eldamennskan hófst.

Starfsmenn Menntaskólans á Tröllaskaga unnu sinn flokk í vinnustaðakeppni lestrarátaksins „Allir lesa“. Hópurinn var í miðflokknum, þar sem voru 18 lið með 10-29 liðsmenn. Tólf starfsmenn MTR voru í liðinu, sem er um helmingur starfsmanna skólans. Á þessi góða frammistaða sinn þátt í að Fjallabyggð endaði í öðru sæti í keppni sveitarfélaga, það voru aðeins Strandamenn sem lásu meira.

Nemendur í Menntaskólanum á Tröllaskaga fylgdust með beinni útsendingu af landsliðsfólki Íslands í dag í skíðagöngu í undankeppni á Heimsmeistaramótinu í Lathi í Finnlandi, en þau eru fimm talsins. Skíðafélag Ólafsfjarðar á tvo fulltrúa á heimsmeistaramótinu og eru það þau Sævar Birgisson og Elsa Guðrún Jónsdóttir

Hópur kennara Menntaskólans á Akureyri kynnti sér náms- og kennsluhætti í MTR í dag. Þetta var fræðslu- og kynnisferð hjá þeim. Mikið var spurt um vinnubrögð við vikuskil og vikuverkefni, þjónustu við fjarnema, víðtæka notkun kennslukerfis, vendikennslu og fleira sem er einkennandi fyrir MTR.

Lára Stefánsdóttir, skólameistari og Valgerður Ósk Einarsdóttir, námskrárstjóri eru í Sisimiut á Grænlandi að leggja lokahönd á verkefni sem skólinn tekur þátt í. Lára er í nefnd á vegum grænlenska menntamálaráðuneytisins, sem er að móta tillögur um skipan fjarkennslu í framhaldsskólum.

Viðfagngsefni sem nemendur geta valið úr í miðannarviku verða fjölbreyttari á þessari önn en nokkru sinni fyrr. Hægt er að velja milli fimm ólíkra áfanga sem kenndir verða hér Ólafsfirði en einnig eru í boði þrír áfangar í Fjölbrautaskólanum á Sauðárkróki. Valið hefst á mánudag.

Nær autt er á láglendi á Tröllaskaga og mjög lítill snjór í fjöllum. Það veldur því að ekki er hægt að kenna áfangann „útvist í snjó“ eins og til stóð. Aðalviðfangsefnin eru, samkvæmt áfangalýsingu, æfingar á gönguskíðum, svigskíðum og fjallaskíðum í samræmi við markmið íþrótta- og útivistarbrautar.

Föngulegur hópur ungra nemenda í Leikskóla Fjallabyggðar heimsótti skólann í morgun í tilefni dags leikskólans. Þau skoðuðu skólann og fannst eðlisfræðistofan sérlega áhugaverð, einkum aðstaðan fyrir tilraunir með eiturefni og fleira. Hópurinn skoðaði líka félagsaðstöðu nemenda og þótti mikið til koma.

Liðlega þrjú hundruð og fimmtíu nemendur eru skráðir í nám við skólann á vorönninni. Þar af eru um eitt hundrað staðnemar en um tvö hundruð og fimmtíu fjarnemar. Þetta eru um tólf prósent fleiri nemendur en á haustönn. Reiknaðir ársnemar í fjárlögum ríkisins eru 125 fyrir þetta ár en á síðasta ári voru þeir 108.

Rebekka Ellen Daðadóttir fjallaði um sjómannaverkfallið og afleiðingar þess í kynningu í stjórnmálafræðitíma í dag. Gert er ráð fyrir að nemendur fylgist með fréttum og séu viðræðuhæfir um helstu fréttamál meðan þeir sitja í áfanganum. Í ljós kom að svo var um sjómannaverkfallið en það kom nemendum nokkuð á óvart hve afleiðingar þess eru víðtækar.