Fréttir

Ellefu nemendur keppa um sæti í nemendaráði Trölla, félags nemenda í skólanum. Kosningin er rafræn. Hún hófst í morgun miðvikudag kl. 10:00 og stendur til föstudags 14. september kl. 12:00. Frambjóðendur kynna sig og áhersluatriði sín í félagslífi skólans á flettiskjá í Hrafnavogum. Það eru fimm sæti í nemendaráðinu sem þessir ellefu nemendur keppa um. Sú eða sá sem hlýtur flest atkvæði verður formaður. Á kjörskrá eru staðnemar og nemar með frjálsa mætingu.

Hefðbundin kennsla fellur niður eftir kl. 10:30 miðvikudaginn 12. september þegar við gerum okkur dagamun til að bjóða nýnema skólans velkomna. Góðir gestir koma í heimsókn og líf og fjör verður vonandi bæði úti og inni. Á nýnemadeginum verður keppt í sápubolta (ef veður leyfir), hægt verður að fara í sund og prófa ýmislegt innahúss. Tölvuklúbburinn kynnir starfsemi sína og nemendur MTR hafa tækifæri til að kynnast stefnumálum þeirra sem bjóða sig fram til setu í nemendaráði Nemendafélagsins Trölla. Í kjölfarið hefst svo rafræn kosning í nemendaráðið fyrir nemendur MTR. Að sjálfsögðu verða veglegar veitingar að hætti Bjargar

Hópur nemenda af listabraut og starfsbraut heimsóttu hið glæsilega nýuppgerða Listasafn Akureyrar. Hlynur Hallson safnstjóri tók á móti hópnum og kynnti nemendum sögu hússins allt frá ýmissi iðnaðarstarfssemi sem var þar í upphafi og fram til stöðunnar í dag. Því næst var skoðuð sýning Magnúsar Helgasonar og Hjördísar Frímann í safnfræðslurýminu. Á efstu hæðinni sem er ein helsta viðbótin við safnið voru sýningar Aðalheiðar Eysteinsdóttur og Sigurðar Árna Sigurðssonar. Áhersla var lögð á að sýna norðlenska listamenn við enduropnun safnsins og kom það því í hlut Aðalheiðar sem er Siglfirðingur og Sigurðar Árna sem er Akureyringur að vígja þessi glæsilegu salakynni. Því næst var skoðuð sýning úr safneign, portrett sýning frá Listasafni ASÍ og fatahönnun Anitu Hirlekar í Ketilhúsinu. Nemendur nutu sín svo í haustblíðunni á Akureyri áður en haldið var til baka.

Skólinn hefur tekið annað skrefið í verkefninu Græn skref í ríkisrekstri og fengið það vottað og viðurkennt. Sorpflokkun hefur verið aukin og er ekki lengur hægt að henda – nema flokka. Notkun pappíshandþurrka á salernum var hætt. Í staðinn kemur ýmist blásturshandþurrkun eða gamaldags handklæði. Aðeins er keyptur umhverfisvottaður pappír og sama gildir um vörur sem unnar eru úr pappír. Þá hefur skólinn sett sér stefnu sem hefur að markmiði að gera starfsemina umhverfisvænni, bæta starfsumhverfi og auka vellíðan. Sjá nánar hér:

Með sparsemi og útsjónarsemi þjónar MTR fleiri nemendum en greitt er fyrir samkvæmt þeirri mælingu menntamálaráðuneytis sem byggist á svokölluðum nemendaígildum. Fjárveiting til skólans er miðuð við 125 nemendaígildi. Það er að segja hún á að duga til að kenna og þjóna á lögbundinn hátt 125 nemendum í fullu námi. Skólinn er hins vegar að framleiða um 140 nemendaígildi, eins og það heitir á máli ráðuneytisins. Skráðir nemendur í upphafi haustannar eru 342. Um það bil 257 eru í fjarnámi en skráðir staðnemar eru um 85. Þetta er fækkun um þrjá tugi frá því á sama tíma í fyrra. Staðnemum fækkar um fimmtán eða svo og er skýrist það af því að fjölmennur hópur fisktækninema brautskráðist í vor. Varðandi fjarnema hefur verið lögð áhersla á að taka inn nemendur sem eru í fleiri áföngum. Það þýðir að rými verður fyrir færri en áður. Hætt var að taka inn fjarnema um síðustu helgi því þá voru fullir allir áfangar þar sem fjarnám er í boði. Starfsmenn eru 26 jafnmargir og í fyrra. Þar af er um þriðjungur í hlutastarfi.

Menntaskólinn á Tröllaskaga var settur í níunda sinn í morgun. Í fyrsta sinn fór setningin fram í eigin húsnæði skólans Hrafnavogum. Salurinn var vígður og tekinn í notkun skömmu eftir skólasetningu í fyrra. Hann hefur mjög fjölbreytt notagildi og er mikið nýttur til náms og kennslu auk þess að vera matsalur og samkomusalur. Lára Stefánsdóttir, skólameistari setti skólann og hvatti nemendur til að læra það sem þeir hefðu áhuga á og vonandi hefðu þeir ánægju af náminu og skólavistinni.

Skráningu í fjarnám er lokið hjá skólanum og fullt í öllum áföngum. Næst verður innritað í nóvemberbyrjun fyrir vorönn 2019.

Nú er sumarleyfum lokið og skrifstofa skólans hefur opnað aftur. Aðsókn var mikil í vor og er nú verið að fara yfir hverjir staðfestu skólavist með greiðslu, taka þá út sem ekki greiddu og taka inn af biðlistum. Nemendur sjá í Innu í hvaða áfanga þeir eru skráðir og þar með hvort þeir hafa fengið skólavist.

Sextánda brautskráning frá Menntaskólanum á Tröllaskaga fór fram í dag. Fjörutíu og fimm nemendur brautskráðust og hafa þeir aldrei verið fleiri. Mikil fjölbreytni einkenndi hópinn, þarna eru einstaklingar sem eiga uppruna í mörgum þjóðríkjum og eru á mismunandi aldri. Tuttugu brautskráðust eftir tveggja ára nám á fisktæknibraut og er þetta í fyrsta sinn sem nemendur ljúka námi af henni. Svanfríður Inga Jónasdóttir, verkefnisstjóri hefur haldið utan um fisktækninámið á Dalvík af röggsemi og skörungsskap. Sjö nemendur útskrifuðust af félags- og hugvísindabraut, sex af íþróttabraut, þrír af náttúruvísindabraut, þrír af listabraut

Vorið 2016 fór stór hópur starfsmanna fiskvinnslu Samherja á Dalvík í raunfærnimat í fisktækni sem Símenntunarmiðstöð Eyjafjarðar (SÍMEY) bauð uppá. Um haustið hófu um 20 þeirra nám í fisktækni, sem starfrækt var í námsveri SÍMEY á Dalvík. Haustið 2017 fór annar hópur frá fiskvinnslu Samherja á Dalvík, og á Akureyri, í samskonar raunfærnimat og hófu nokkur þeirra nám þá um haustið. Þar af komu þrír inn í þann námshóp sem farinn var af stað á Dalvík og útskrifast núna í vor. Námið er í samstarfi SÍMEY, Fisktækniskóla Íslands og Menntaskólans á Tröllaskaga, sem innritar nemendur í námið og útskrifaði 19. maí 20 nemendur af fisktæknibraut. Auk þess er mikilvægt að gott samstarf sé við vinnustað nemenda, því um er að ræða nám með vinnu. Námið er 120 einingar, grunngreinar sem SÍMEY heldur utanum og faggreinar sem Menntaskólinn á Tröllaskaga hefur veg og vanda af. Forsenda þess að fara í þetta nám hefur verið að viðkomandi hafi farið í raunfærnimat, en til þess þarf 3 ára starfsreynslu í fiskiðnaði og a.m.k. 23 ára aldur. Nemendur eru því allir þjálfað fiskvinnslufólk sem með raunfærnimati fær reynslu sína og þekkingu metna til eininga, og bætir síðan við sig með formlegu námi því sem uppá vantar. Nemendur eru af ýmsu þjóðerni, sem endurspeglar þann fjölbreytta mannauð sem er að finna innan fiskvinnslunnar á Eyjafjarðarsvæðinu. Í útskriftarhópum núna eru t.d. þrír af pólskum uppruna, tveir af lettneskum, tveir af thailenskum og ein kom frá Grænhöfðaeyjum. Það hefur sjálfsagt aldrei verið mikilvægara en nú að starfsfólk í fiskvinnslu sæki sér menntun og aukna þekkingu þar sem tæknibreytingar eru mjög miklar í greininni og kröfur til starfsfólks aukast sífellt. Samstarfsaðilar eru stoltir af þeim stóra hópi öflugs fiskvinnslufólks sem útskrifast úr náminu nú, vorið 2018, og þykjast þess vissir að þau muni enn frekar láta til sín taka þegar þau nú hafa lokið þessum áfanga.