Fréttir

Í miðannaráfanga smíðuðu nokkrir nemendur frá grunni gamaldags spilakassa. Hann hentar til að spila klassíska tölvuleiki, þrjátíu til fjörutíu ára gamla. Mikil orka og tími fór í sjálfa trésmíðina en uppsetning vél- og hugbúnaðar tók líka sinn tíma. Markmið í áfanganum var að veita nemendum þekkingu og skilning á tækjaforritun. Þeir áttu líka að öðlast leikni í að greina og skilja hugbúnað og vélbúnað og samspil þeirra og geta beitt bilanagreiningu, leyst vandamál og gert við. Spilakassinn verður aðgengilegur í opnu rými í skólanum. Annað verkefni í áfanganum var að gera klára Alexu, gervigreindartæki sem hægt er að nota til ýmissa hluta en mun til að byrja með stýra hljóði í Hrafnavogum. Kennari í áfanganum var Eyþór Máni Steinarsson.

Í þessum miðannaráfanga kynnast nemendur meðal annars fjölbreyttum íþróttagreinum sem þeir þekktu ekki áður. Markmiðið er að hver og einn geti fundið „sína íþrótt“ og stundað hana til að lifa heilsusamlegu lífi. Kynningarnar eru bæði bóklegar og verklegar. Leiðbeinandi er Örn Elí Gunnlaugsson, útskrifaður af íþróttabraut MTR fyrir nokkrum árum. Örn Elí er í þriggja vikna starfsnámi við skólann en hann útskrifast sem íþróttafræðingur frá Háskóla Íslands í vor.

Tíu starfsbrautarnemar kynnast í miðannarvikunni rekstri veitinga- og gistihúss. Það er Ida Semey, eigandi Kaffi Klöru og Anna Kristín dóttir hennar sem leiðbeina hópnum við margvísleg störf. Nemendahópurinn hefur meðal annars tekið þátt í velja rétti á matseðil, matreiða þá og framreiða. Lagaðir hafa verið spennandi spænskir réttir, þeytingur eða búst og margt fleira. Nemendurnir hafa líka afgreitt á veitingahúsinu og í mötuneyti skólans og þeir hafa þvegið upp og gengið frá eftir máltíðir, búið um rúm, ryksugað og skúrað.

Fræðslukvöld þriðjudaginn 27. febrúar kl. 20:00 í Hrafnavogum, MTR Þrátt fyrir ótal jákvæðar hliðar tækniframfara undanfarinna ára er þróunin ekki laus við áskoranir af ýmsu tagi. Gömul vandamál eins og einelti, fordómar, hatursorðræða og neikvæð samskipti hafa fundið sér nýjan farveg á netinu og geta dreifst víðar en áður. Börn og ungmenni dagsins í dag alast upp á netinu og kynnast mörg hver skuggahliðum þess af eigin raun ung að aldri.Þess vegna er afar mikilvæg að börn og ungmenni fái vandaða fræðslu og tækifæri til þess að ræða þessar skuggahliðar samtímans á yfirvegaðan hátt undir leiðsögn. SAFT fyrirlestarinn Ólína Freysteinsdóttur, fjölskyldufræðingur leiðir fræðsluna sem byrjar stundvíslega í Hrafnavogum kl. 20:00 þriðjudagskvöldið 27. febrúar.

Hópar nemenda frá MTR og PT framhaldsskólanum á Ítalíu hafa fengið gríðarlega góðar móttökur hjá samstarfsskólanum á Lanzarote. Opinber móttaka var fyrir nemendahópinn, kennara þeirra og leiðbeinendur hjá bæjarstjóranum í ráðhúsinu í Tías í gær. Verkefnið, sem snýst um valdeflingu og sjálfbærni var í sjónvarpsfréttum á Lanzarote í gær. Í fréttinni má m.a. sjá og heyra Hauk Orra þenja nikkuna í móttökunni:

Nemendur þriðja bekkjar í Grunnskóla Fjallabyggðar heimsóttu skólann í morgun og skoðuðu húsakynni og ýmis tæki og áhöld sem notuð eru við kennslu. Mestan áhuga vakti dótið úr vélmennafræðinni en einnig þótti mörgum spennandi að skoða hljóðfærin í tónlistarstofunni og fá að prófa sum þeirra. Íþróttaáhugamönnum í hópnum þótti mikið koma til klifurbúnaðar og skíða af ýmsum gerðum sem hér eru til. Beinagrindin þótti líka áhugaverð og líkneski af manneskju með líffærum brjóst- og kviðarhols. Hægt er að skoða líffærin hvert fyrir sig og við athugun reyndist líkneskið vera af konu með fóstur í leginu.

Nú er í gangi jarðskjálftahrina fyrir norðan land. Sú hrina sem nú stendur yfir er á nyrðra þverbrotabelti sem liggur norður af Grímsey en ekki því sem er nær okkur og liggur sunnan Grímseyjar og er næst okkur nokkuð norður af Siglufirði og liggur síðan til Þeistareykja. Sjaldnast leiða þessar hrinur til stærri skjálfta en möguleikinn er fyrir hendi og þekkt að stærri skjálftar verða á okkar svæði með jöfnu millibili. Því teljum við mikilvægt að fara yfir viðbrögð við jarðskjálftavá og hefur öryggisáætlun sú sem verið er að vinna núna verið uppfærð. Búið er að fara yfir helstu atriði með kennurum og verður farið yfir málið með nemendum á miðvikudag. Búið er að fara yfir húsnæði skólans og skilgreina hverju þarf að bæta úr frá því síðast var farið yfir. Uppfært kl. 13:20 - Ríkislögreglustjóri hefur í samráði við Lögreglustjórann á Norðurlandi eystra lýst yfir óvissustigi almannavarna vegna jarðskjálftahrinu úti fyrir Norðurlandi. Hér má finna viðbrögð skólans:

Fimmtudaginn 15. febrúar fengum við tvo unga tónlistarmenn úr Fjallabyggð í heimsókn í skólann og glöddu þeir nemendur og starfsfólk í matarhléinu með ljúfum tónum. Þetta voru tvíburabræðurnir Júlíus og Tryggvi Þorvaldssynir sem hafa vakið töluverða athygli að undanförnu fyrir vandaðan söng og gítarleik. Þeir eru í 9. bekk Grunnskóla Fjallabyggðar auk þess að stunda tónlistarnám við Tónlistarskólann á Tröllaskaga og hafa komið víða fram undanfarna mánuði. Þeir komu m.a. fram á svæðistónleikum Nótunnar á Norður- og Austurlandi, sem fram fór á Akureyri á dögunum og var atriði þeirra eitt af þeim sem hrepptu þátttökurétt á lokahátíð Nótunnar sem fram fer í Hörpu 4. mars nk. Bræðurnir hafa komið fram á ýmsum skemmtunum í Fjallabyggð að undanförnu og fyrir stuttu hituðu þeir upp fyrir hljómsveitina Ný Dönsk þegar hún hélt tónleika á Kaffi Rauðku á Siglufirði. Á næstu vikum mun fleira listafólk af svæðinu láta ljós sitt skína í skólanum, nemendum og starfsfólki til yndisauka.

Hægt er að nota ýmsa tækni til að kenna nemendum í fjarskanum í lýðheilsuáföngum. Lísebet Hauksdóttir, íþróttakennari hefur kosið að nota „sportstracker“ appið. Hún telur að það sé frábær leið fyrir nemendur sem leiðist í íþróttum eða ráða illa við að vera í hóp. Innbyggt er að veita hrós og gefa nemendum þá tilfinningu að þeir séu hluti af heild. Þeir geta valið tegund hreyfingar, til dæmis göngu, hjólreiðar, skíði, hreyfingu í ræktinni eða reiðtúr. Í forritinu kemur fram fjöldi skrefa og kílómetra, meðal- og hámarkshraði, ásamt púls og yfirlitsmynd yfir leiðina sem farin var þannig að þetta gengur mjög vel. Nemendur senda síðan upptöku úr tækinu til kennara og fá hreyfinguna metna. Lísebet segir að margir nemendur haldi áfram að nota tæknina eftir útskrift og séu að senda sér myndir og upplýsingar úr „sportstracker“ af því sem þau eru að gera.

Undirbúningur ellefu nema fyrir næsta áfanga í erlenda samstarfsverkefninu um sjálfbærni og valdeflingu er í fullum gangi. Lagt verður af stað á föstudag og komið heim tíu dögum síðar. Samstarfsaðilar eru framhaldsskólar á Lanzarote, einni Kanaríeyja og á Ítalíu. Íslendingar og Ítalir ferðast til Lanzarote í þessum áfanga verkefnisins og njóta gestrisni heimamanna þar. Markmiðið er að sjá og skoða sem mest af því sem ferðaþjónusta á eynni býður gestum. Spurningin er - hvers njóta ferðamenn þar? Flestir MTR nemar gista hjá fjölskyldum og hafa þegar hafið samskipti við gestgjafa sína. Samstarfsaðilarnir á Lanzarote hafa undirbúið komu gestanna mjög vandlega og greinilega hugsað fyrir flestu. Almenningssamgöngur eru til dæmis lélegar á eynni og hafa gestgjafarnir því útvegað bílaleigubíla til að komast á milli staða. Sérstakir bolir hafa líka verið hannaðir fyrir þátttakendur. Ferðareglur hópsins frá MTR eru fimm og er þar efst á blaði að allir séu jákvæðir, haldi hópinn, sýni kurteisi og tillitssemi og láti strax vita ef eitthvað bjátar á. Verkefnið tekur tvö ár og er þema þess að finna leiðir til að efla nemendur til að takast á við framtíðina í hörðum heimi. Allir þátttakendur eru af landsbyggðinni í heimalöndum sínum og munu ef að líkum lætur þurfa að skapa eigin tækifæri til framfærslu í heimabyggð. Vinnan tengist meðal annars vistvænni ferðaþjónustu, listum og íþróttum. Hugmyndin er „samstarf við þróun viðskiptahugmynda sem geta veitt lífsviðurværi í sjálfbærum samfélögum á ólíkum stöðum“. Tilgangurinn er að auka líkur á að ungt fólk skapi sér framtíð í heimabyggð. Erasmusstyrkur að upphæð ellefu milljónir króna fékkst til verkefnisins og því er stýrt af starfsmönnum MTR.