Fréttir

Líðan nemenda í skólanum og verðið á matnum í mötuneytinu var meðal þess sem nemendur ræddu á skólafundi. Fundurinn er vettvangur nemenda til að ræða hagsmunamál sín og koma með ábendingar um breytingar sem þeir telja æskilegar. Að þessu sinni var, auk þess sem að framan var nefnt, rætt um nýnemadaginn fyrr í haust og skipulag í skólastofum, einkum í Brimnesi, þar sem uppröðun var breytt frá síðasta skólaári. Fram komu hugmyndir um að setja borðtennis- og billjarðborð í skólastofu og nota þau til að læra við þegar leikir væru úti. Hugmynd var líka hreyft um færa leikjatölvur úr sal í lokuð rými. Varðandi mötuneytið kom fram að nemendum finnst maturinn dýr og var varpað fram hugmyndum um hvernig hugsanlegt væri að lækka verðið, t.d. með fleiri miðum á matarkortunum sem viðskiptavinir mötuneytisins kaupa og greiða fyrirfram. Samkvæmt lögum um framhaldsskóla á að halda skólafund að minnsta kosti einu sinni á ári og eiga starfsmenn og fulltrúar nemenda rétt til setu þar samkvæmt nánari ákvörðun skólameistara. Í MTR hefur verið litið svo á að allir nemendur ættu rétt til að sitja fundinn og þeir hafa verið hvattir til að gera það. Sjálfsmatsteymi skólans fjallar um niðurstöður einstakra hópa og kynnir þær fyrir stjórnendum, skólanefnd og starfsmönnum skólans.

Sýning mánaðarins í Hrafnavogum er ekki helguð einum listamanni eins og hingað til hefur verið. Þórarinn Hannesson, menningarfulltrúi, ákvað að breyta út af venjunni og setja saman sýningu á verkum í eigu starfsmanna skólans. Hverjum starfsmanni var í sjálfsvald sett hvaða verk úr sinni eigu hann legði til eða hvort hann tæki þátt. Það bárust þrettán verk sem auðga tilveru nemenda og starfsmanna í september. Verkin eru af ýmsu tagi en oftar en ekki eru einhver tengsl milli eiganda og listamanns. Margir listamannanna eru af svæðinu eða tengdir því með einhverjum hætti en aðrir hafa aldrei drepið niður fæti á Tröllaskaga, svo vitað sé. Verkunum fylgja söguskýringar frá eigendum um tilurð verkanna eða tengsl þeirra við höfundinn. Myndin sem fylgir fréttinni var tekin þegar Bergþór myndlistarkennari aðstoðaði menningarfulltrúann við að koma myndunum fyrir. Gestum og gangandi er velkomið að skoða sýninguna á skólatíma.

Mikael Sigurðsson nemandi á fyrsta ári í MTR hefur áhugamál sem teljast verður óvenjulegt hjá svo ungum einstaklingi. Áhugamálið er fuglaskoðun og fuglaljósmyndun. Hann stefnir að því að slá Íslandsmet með því að verða yngstur til að sjá og mynda 200 fuglategundir. Hann er aðeins fimmtán ára og er kominn í 171 tegund. Fuglarnir verða að vera lifandi þegar mynd næst af þeim. Síðan þarf að senda myndina til Flækingsfuglanefndar og hún þarf að staðfesta tilvikið. Mikael náði í síðustu viku að mynda ormskríkju, lítinn amerískan spörfugl, við Reykjanesvita. Fleiri náðu mynd af fuglinum, er þessi tegund hefur aðeins einu sinn áður sést hér á landi.

Hluti af námi í áfanganum útivist í snjóleysi, ÚTIV2HR05, felst í þjálfun í að meta aðstæður í náttúrunni með tilliti til öryggis og öðlast sjálfstæði í óbyggðum. Áhersla er lögð á virðingu fyrir náttúrunni og góða umgengni um landið. Nemendur í áfanganum og tveir útivistarkennarar fóru í námsferð fyrir helgina og lágu úti í Héðinsfirði. Eftir vandlegan undirbúning var lagt af stað um miðjan dag á fimmtudag og komið til baka um sólarhring síðar. Farið var frá þjóðveginum, með viðeigandi búnað á bakinu og gengið niður að sjó. Áð var nokkrum sinnum á leiðinni og Gestur, annar kennarinn, sagði sögur af lífinu í Héðinsfirði, meðan þar var enn byggð og fræddi nemendur um örnefni. Eftir tæplega þriggja klukkustunda göngu var slegið upp tjöldum við slysavarnarskýlið í Vík, austan megin í Héðinsfirði. Þar var eldað og gist um nóttina. Eftir ágætan nætursvefn útbjuggu nemendur morgunverð og neyttu og síðan var komið að því að pakka saman og ganga til baka. Veður var gott, eftir miklar rigningar dagana á undan og nutu nemendur útiverunnar. Að sjálfsögðu reyndi nokkuð á þá í ferðinni. Sumir höfðu ekki gist í tjaldi áður og það tók á að bera allan farangurinn. Svo var ekkert símasamband! Kennarar í ferðinni voru Kristín Anna Guðmundsdóttir og Gestur Hansson.

Nemendur í áfanganum ÍÞRG1GF02 stunda golfið grimmt þessa dagana. Áfanginn er tvískiptur, það er golf fram að miðönn en frjálsar íþróttir eftir það. Sautján nemendur eru í áfanganum og eru þeir mjög áhugasamir um golfið. Íþróttin hefur ekki áður verið kennd við skólann nema á stuttu námskeiði í miðannarviku fyrir nokkrum árum.

Nemendur í myndlist og á starfsbraut gerðu sér dagamun og brugðu sér í menningarferð til Akureyrar í gær. Þar er blómlegt menningarlíf og margt að sjá. Til að fá smá nasasjón af því sem þar er í gangi var ákveðið að fara á nokkra staði þó stoppað væri stutt á hverjum þeirra. Fjölbreyttar sýningar eru í nýjum salarkynnum Listasafns Akureyar. Guðrún Pálína Guðmundsdóttir, fræðslufulltrúi tók á móti hópnum. Fyrst var skoðuð samtímalist frá Þjóðarlistasafninu í Lettlandi. Talaðu við mig! / Runā ar mani! / Talk to Me! Það var áhugavert fyrir nemendur að upplifa verkin frá Lettlandi sem mörg hver fást við ákveðið uppgjör við Sovéttímann og járntjaldið. Hugtök sem eru ekki svo fjarlæg okkur í tíma en ungum nemendum þó framandi.

Í nágrenni MTR eru fjölmargir og fjölbreyttir möguleikar til kennslu í útivist. Einn áfanginn er útivist í snjóleysi, ÚTIV2HR05, sem kenndur er að hausti þegar jörð er auð. Hann er að mestu verklegur. Nemendur kynnast undirstöðuatriðum í klettaklifri, sigi, fjallahjólun, sjósundi, sjókajakróðri, útieldamennsku og fjallamennsku. Mikil áhersla er lögð á að nemendur verði sjálfstæðir í óbyggðum, geti metið aðstæður með tilliti til öryggis og tekið skynsamlegar ákvarðanir varðandi t.d. leiðaval og notkun öryggisbúnaðar. Í gær hjóluðu nemendur í þessum áfanga “sveitahringinn”, en svo kallast leiðin í kringum Ólafsfjarðarvatn. Leiðin er um 17 kílómetrar og voru aðstæður nokkuð krefjandi, frekar blautt eftir rigningar síðustu daga og vegurinn holóttur. Stemningin var engu að síður góð og nemendur skemmtu sér vel. Í ferðarlok var ekki vanþörf á að renna við á þvottaplaninu hjá Olís og skola af fararskjótunum og jafnvel nemendum líka.

„Þú hefur líka rödd“ er titill samstarfsverkefnis sem hófst núna um mánaðamótin. Þátttakendur eru frá Grikklandi, Lettlandi og Tékklandi auk Íslands. Markmið verkefnisins er að þjálfa nemendur í virkri þátttöku og kenna þeim að axla ábyrgð í lýðræðisþjóðfélagi. Á þeirra herðum mun hvíla að efla og þróa lýðræði og menningu í evrópskum samfélögum. Verkefnið er í fjórum hlutum og verður unnið á tveimur árum. Í fyrsta hluta verður fjallað um borgaralega ábyrgð, starf sjálfboðaliða og kosningar. Í öðrum hluta verður fjallað um jafnrétti í fjölmenningarlegu samfélagi. Tjáningarfrelsi er þemað í þriðja hluta. Þar lesa nemendur bækur sem hafa verið bannaðar og kynnast falsfréttum, áróðri og spuna í fjölmiðlum. Í síðasta hlutanum verður svo fjallað um lýðræðismenningu, mótmælaaðgerðir og borgaralega óhlýðni. Lára Stefánsdóttir, skólameistari og Ida Semey verkefnisstjóri erlendra samstarfsverkefna sátu í dag fund í Reykjavík þar sem þar sem afhentir voru samningar um verkefni til þeirra skóla sem hlutu Erasums+ styrki ásamt fræðslu til styrkhafa um vinnu við verkefnið. Verkefnisstyrkurinn nemur í heild um átján milljónum króna en þar af verður um fimm milljónum varið til að kosta þátttöku MTR. Sérstakir umsjónarmenn skólans með verkefninu verða Karólína Baldvinsdóttir og Sigríður Ásta Hauksdóttir.

Nemendur MTR og gestir úr Grunnskóla Fjallabyggðar og Dalvíkurskóla brugðu á leik og skemmtu sér saman í gær. Sápubolti var leikinn af kappi og sýndu margir góða takta eins og myndirnar sem fylgja fréttinni sýna. Húlladúllan var mætt og hvatti nemendur til að prófa ýmislegt dót sem tilheyrir sirkuslistum. Þetta þótti mörgum spennandi. Einhverjir brugðu sér í sund en aðrir spiluðu hlutverkaspil. Grillmeistari var Björg Traustadóttir og sporðrenndu heimamenn og gestir þeirra um 180 pylsum. Ekki er gefið upp hvort þetta voru hefðbundnar pylsur með kjöti eða grænmetispylsur sem sagðar eru njóta vinsælda í höfuðstaðnum um þessar mundir.

Góð mæting var á foreldrafund síðdegis í gær þar sem starfsmenn skólans kynntu skipulag náms og starfshætti í skólanum. Fjallað var um vendikennslu, starfsbraut, tölvukerfi, reglur um mætingu, sértæk námsúrræði, félagslíf, menningu og fleira. Í lok fundar voru kjörnir fimm fulltrúar sem mynda foreldraráð skólans í vetur. Anna Hulda Júlíusdóttir, Birgitta Sigurðardóttir, Heimir Birgisson, Kristján Sturlaugsson og Ólöf Ásta Salmannsdóttir.