Fréttir

Tólf stúdentar brautskráðust frá Menntaskólanum á Tröllaskaga í dag. Þrír útskrifuðust af félags- og hugvísindabraut, einn af útivistarsviði íþróttabrautar, tveir af listabraut, einn af kjörnámsbraut og fimm luku viðbót við starfsnám til stúdentsprófs. Þessir tólf nemendur koma frá átta stöðum á landinu og ellefu þeirra voru fjarnemar við skólann. Lára Stefánsdóttir, skólameistari greip til líkinga þegar hún ávarpaði brautskráningarhópinn. Hún rifjaði upp atburði síðustu tíu daga í landshlutanum. Hvernig menn hefðu gripið í tómt þegar þeir ætluðu að nota rafmagn, síma og aðra innviði. Hún sagði að í námi byggðu nemendur upp innviði sína, tileinkuðu sér færni af ýmsu tagi, læsi, reikning, notkun erlendra tungumála og fjölmargt annað. Hún sagðist þess fullviss að stúdentsprófið myndi nýtast vel, það væri ákveðin innistæða en símenntun væri líka nauðsynleg. Brynjar Bjarkason flutti ávarp nýstúdents. Hann þakkaði skólanum fyrir tækifæri til að klára námið á eigin forsendum. Hann hefði byrjað í framhaldsskóla fyrir tíu árum en loksins væri náminu lokið með stúdentsprófi eftir nokkur stopp og pásur. Hann sagðist reikna með að margir væru í sömu sporum. En Menntaskólinn á Tröllaskaga hefði veitt mjög sérstakt tækifæri til að ljúka náminu án þess að segja upp vinnu, flytja að heiman eða taka kvíðvænleg lokapróf. Brynjar þakkaði starfsmönnum skólans fyrir áhuga og frumkvæði og hvatti samstúdenta sína til að setja sér markmið og vinna ötullega að þeim. Hjá Jónu Vilhelmínu Héðinsdóttur, aðstoðarskólameistara kom fram að um 340 nemendur hefðu stundað nám við skólann á önninni. Þar af hefðu 248 verið skráðir í fjarnám. Fjölmennasta brautin var félags- og hugvísindabraut með 138 nemendur, 55 voru á náttúruvísindabraut, 52 á listabraut, 43 á íþróttabraut, 14 á kjörnámsbraut, 7 á starfsbraut og 16 á grunnmenntabraut, þar af 10 grunnskólanemar. Við útskriftina önnuðust Hörður Ingi Kristjánsson, Júlíus og Tryggvi Þorvaldssynir og Mikael Sigurðsson tónlistarflutning með aðstoð Guðmanns Sveinssonar kennara síns á tónlistarbrautinni.

Að venju eru verk nemenda á listabraut áberandi á sýningunni en einnig gefur að líta verk nemenda á starfsbraut, nema í íslensku, ensku, frumkvöðlafræði og inngangi að félagsvísindum. Málverk, skúlptúrar, ljósmyndir og verk úr endurnýttum efnum setja svip á sýninguna. Mörg málverk bárust úr áföngum í listasögu og heimspeki fagurfræðinnar. Fjölmargar litríkar sjálfsmyndir frá nemendum í áfanganum Efni og litir prýða anddyri skólabyggingarinnar. Frumleg og fjölbreytileg verk innblásin af Gylfaginningu fylla eina stofu. Þetta eru verkefni úr íslenskuáfanga á öðru þrepi. Efniviðurinn er fjölbreyttur, auk málverka og teikninga gefur að líta prjónaða peysu, verk úr perlum, teiknimyndasögur og fleira. Sérstaka athygli vekur ljósmyndaröð með leiknum atriðum úr Gylfaginningu, tekin í Kjarnaskógi við Akureyri. Þá skiluðu fjórir nemendur frumsömdu lagi með eigin texta sem þeir fluttu á sýningunni. Fjórmenningarnir og fleiri sáu um lifandi tónlist á meðan gestir og heimamenn nutu sýningarinnar. Óveður setti stórt strik í reikninginn við undirbúning sýningarinnar þar sem nær allt skólastarf féll niður síðustu viku annarinnar. Þrátt fyrir að kennarar væru hríðtepptir utan Ólafsfjarðar tókst að koma sýningunni upp á mettíma. Sýningarstjórinn Bergþór Morthens hengdi síðustu myndina upp fimm mínútum áður en sýningin var opnuð.

Eins og varla hefur farið framhjá neinum hefur óveðrið í vikunni sett strik í reikninginn hjá okkur í MTR eins og svo mörgum landsmönnum. Rafmagnslaust hefur verið í Ólafsfirði og tölvukerfi skólans því legið niðri. Skólameistari hefur gefið kennurum heimild til að framlengja skilafrest þar sem þess er þörf. Frekari upplýsingar i Moodle.

Nemendur og kennarar á námskeiðum Símenntunarmiðstöðvar Eyjafjarðar í Ólafsfirði og á Dalvík gerðu sér glaðan dag í lok námskeiða haustannar. Námsgreinar voru íslenska og spænska og voru viðurkenningar afhentar á samkomunni. Hún var skipulögð með skömmum fyrirvara en þrátt fyrir það voru gestir á fimmta tug. Þetta var svokallað Pálínuboð þar sem gestir komu með veitingar á hlaðborð. Réttir voru fjölbreyttir enda þátttakendur upprunnir á ýmsum menningarsvæðum. Sýndur var dans frá Filippseyjum og farið í samkvæmisleik. Það er ánægjulegt að hin góða aðstaða í sal MTR skuli nýtast til samkomhalds af þessu tagi

Sköpunargleði og einbeiting skein úr svip gesta á jólasmiðju skólans í gær. Meðal gesta voru nokkrir nemendur grunnskólans. Þeir nutu eins og aðrir gestir leiðbeininga listgreinakennara skólans. Meðal annars voru steypt og skreytt kerti og málaðar ýmsar jólalegar fígúrur sem skornar voru út í laserskera skólans. Auk þess að næra andann á aðventunni í góðum félagsskap er stafrænni smiðju ætlað að efla skapandi hugsun í námi í samstarfi við nærsamfélagið. Hugmyndin er að bæði grunnskólanemar og íbúar hafi aðgang að slíkum smiðjum auk nemenda skólans. Þetta er sérstakt markmið í skólastarfinu og tengist bæði markmiðum ríkisstjórnarinnar og heimsmarkmiðum Sameinuðu þjóðanna.

Innritun fyrir vorönn 2020 er lokið bæði í fjar- og staðnámi og skólinn fullsetinn. Nemendur sem hlotið hafa skólavist sjá stöðu sína í Innu.

Jólafastan er að jafnaði ekki tími gróðursetningar. Þvert á móti er hefð fyrir því að fella tré, skreyta þau og kalla jólatré. En í MTR eru hefðir ekki allsráðandi og skapandi hugsun í hávegum höfð. Því var ákveðið að nýta þennan hlýja og fallega desemberdag til að gróðursetja nokkur tré á skólalóðinni. Tegundirnar eru birki og reynir og eru trén mera en tveir metrar á hæð. Samkvæmt almennum ráðleggingum Hafsteins Hafliðasonar er tíminn til að gróðursetja tré frá lokum ágústmánaðar og eiginlega allur veturinn, svo framarlega að mold sé það þíð að handhægt sé að grafa holur fyrir ræturnar. Þetta síðasta skilyrði má deila um hvort verið hafi fyrir hendi í Ólafsfirði í dag. En við vonum hið besta og ætlum að trúa því að trén sem plantað var lifi og verði nemendum og starfsmönnum til yndisauka.

Nokkrir nemendur á starfsbraut hafa að undanförnu unnið með nærumhverfi sitt í Ólafsfirði. Það var m.a. gert með því að fara í gönguferðir, taka ljósmyndir og rýna í kort til að átta sig á staðháttum og örnefnum. Síðan var unnið með ljósmyndirnar og útlínur fjallahringsins teiknaður upp, örnefni sett inn og fræst í glært plexígler með laserskera. Þannig er hægt að bera saman við fjöllin og sjá hvað þau heita. Þetta verkefni var unnið sameiginlega í náttúruvísindum og listum. Hægt verður að sjá afraksturinn af þessu skemmtilega verkefni á haustsýningu skólans 14. desember. Á myndinni virða Kristinn Gígjar Egilsson og Sæbjörg Ágústsdóttir stuðningsfulltrúi fyrir sér fjöllin í Ólafsfirði.

Skólanefnd MTR ræddi á fundi sínum í dag um sérstök markmið í skólastarfinu sem tengjast heimsmarkmiðum Sameinuðu þjóðanna og markmiðum ríkisstjórnarinnar. Þrettánda markmið SÞ er að menntun verði aukin til að vekja vitund um hvernig fólk og stofnanir geta haft áhrif og brugðist við loftslagsbreytingum. MTR ætlar að efla vitund nemenda og starsfólks um umhverfismál og ná markmiðum grænfánaverkefnis Landverndar og grænna skrefa í ríkisrekstri. Skólinn ætlar að hafa virkt umhverfisráð, bjóða a.m.k. tíu áfanga þar sem fjallað er um umhverfismál og skipuleggja viðburði í samfélaginu sem tengjast málaflokknum. Stafrænni smiðju er ætlað að efla skapandi hugsun í námi í samstarfi við nærsamfélagið. Hugmyndin er að bæði grunnskólanemar og íbúar hafi aðgang að smiðjunum auk nemenda skólans. Þetta markmið tengist bæði markmiðum ríkisstjórnarinnar og heimsmarkmiðum SÞ. Á fundinum kom fram að á vorönn býður skólinn upp á leiklistaráfanga í samstarfi við Leikfélag Fjallabyggðar, nemendur munu taka þátt í uppfærslu félagsins. Þá sögðu starfsmenn frá vel heppnuðum fræðsludegi norðlenskra framhaldsskólakennara sem skólinn hélt fyrr í haust. Greint var frá góðri aðsókn að skólanum, færri fá skólavist á vorönninni en sóttu um. Þá var greint frá því að undirbúiningur þess að skólinn fái jafnlaunavottun stendur nú sem hæst. Á fundinum voru Edward H. Huijbens, formaður, í fjarverunni Evu, Rósa Jónsdóttir, Dóróþea Guðrún Reimarsóttir, Guðríður Harpa Elmarsdóttir, áheyrnarfulltrúi nemenda, Unnur Hafstað Ármannsdóttir áhreyrnarfulltrúi kennara, Lára Stefánsdóttir skólmeistari og Jóna Vilhelmína Héðinsdóttir, aðstoðarskólameistari.

Í mannfræðiáfanga á haustönninni spreyttu nemendur sig meðal annars á því að finna muninn á töfrum og göldrum. Hann er ekki augljós en í fræðunum eru töfrar gjarnan skilgreindir sem athafnir þar sem ýtt er á hið yfirnáttúrulega eða það neytt til aðstoðar. Galdrar voru á hinn bóginn notaðir til illra verka. Í daglegu tali er ekki gerður mikill munur á göldrum og töfrum, Einar Mikael, sem heimsótti skólann í vikunni kallar sig til dæmis töframann en auglýsir galdranámskeið fyrir börn. Hann sýndi listir sínar sem við getum kallað spilagaldra eða töfrabrögð. Þessar athafnir glöddu viðstadda og sumir tóku þátt í þeim. Þeir sátu eftir með ákveðnar efasemdir um hvernig þetta væri hægt. Við því eru ekki svör en við getum að minnsta kosti sagt að Einar Mikael hafi stráð töfrum sínum yfir nemendur og kennara skólans.