Fréttir

Úrslit í stærðfræðikeppni Fjölbrautaskóla Norðurlands vestra, Menntaskólans á Tröllaskaga og níundu bekkja í grunnskólum á Norðurlandi vestra og Tröllaskaga fór fram í Ólafsfirði í gær. Í fyrsta sæti varð Hjalti Freyr Magnússon, Grunnskóla Húnaþings vestra. Þorsteinn Jakob Klemensson í Dalvíkurskóla varð í öðru sæti og Jóhann Gunnar Eyjólfsson í Árskóla í þriðja sæti. Allir keppendur fóru heim með smá glaðning og vegleg verðlaun voru veitt fyrir efstu þrjú sætin. Keppnin var jöfn og spennandi og keppendur allir sjálfum sér og skólum sínum til sóma. Þetta er í tuttugasta og annað sinn sem keppnin er haldin.

Þrír kennarar skólans taka þátt í listsýningum þessa dagana. Bergþór Morthens og Sigurður Mar Halldórsson taka þátt í samsýningu norðlenskra listamanna sem opnuð var formlega í Listasafninu á Akureyri um síðustu helgi. Samtals valdi dómnefnd verk 30 myndlistarmanna á sýninguna. Á laugardaginn kemur opnar svo Karólína Baldvinsdóttir ásamt Jonnu/Jónborgu Sigurðardóttur sjónlistasýningu í Mjólkurbúðinni í Listagilinu sem ber titilinn Auga fyrir Auga. Verkin voru unnin á undanförnum mánuðum og er augað viðfangsefni sýningarinnar. Karólína og Jonna eru báðar blindar á öðru auga og er það innblástur verkanna.

Nemendur í útivist hafa tekið þátt í mörgum spennandi verkefnum á önninni. Síðasta verkefnið var unnið á vorsýningu skólann s.l. laugardag þegar þeir buðu upp á grænmetissúpu sem hituð var yfir eldi á lóð skólans. Hráefni í súpuna kom frá verslunum Kjörbúðarinnar á svæðinu, grænmeti sem ekki var lengur söluhæft en hæft til neyslu. Átti þetta verkefni meðal annars að vekja nemendur til umhugsunar um að nýta matvæli vel og forðast sóun, auk þess að þjálfa þá í eldun úti í náttúrunni. Getum sýningarinnar bauðst að smakka á súpunni og þótti hún afbragðsgóð. Nemendur stóðu sig vel í eldamennskunni og þótti verkefnið spennandi. Kennari í útivist var Kristín Anna Guðmundsdóttir.

Fjölmenni sótti á laugardaginn var sýningu á verkum nemenda MTR á vorönninni. Verk nemenda í skapandi hannyrðum, útsaumur í stóla og hekl um borðfætur vakti athygli. Einnig myndverk af ýmsu tagi, til dæmis úr því til til fellur, svo sem glæsileg mynd úr töppum gosflaskna. Útvarpsstöðin Trölli tók þátt í sýningunni, sendi út viðtöl beint og spilaði stutt innslög sem nemendur gerðu á önninni. Framan við skólahúsið var líf og fjör, ungir sem aldnir blésu sápukúlur og krítuðu listaverk á stéttina. Segja má að gleðin hafi verið við völd í Ólafsfirði þennan dag og menning og listir blómstrað á ýmsum uppákomum. Nemendur og starfsmenn MTR þakka gestum fyrir komuna á vorsýninguna og minna á að hægt er að njóta hennar á skólatíma fram á útskriftardag, næsta laugardag.

Menntaskólinn á Tröllaskaga varð „Stofnun ársins 2019“ í flokki meðalstórra ríkisstofnana á hátíðlegri athöfn á Hilton Nordica 15. maí að viðstöddu fjölmenni. Stofnun ársins og Fyrirmyndarstofnun hljóta þær stofnanir sem þykja skara fram úr að mati starfsmanna. Valið er byggt á svörum rúmlega 10 þúsund starfsmanna í einni stærstu vinnumarkaðskönnun landsins. Gallup framkvæmir könnunina fyrir Sameyki stéttarfélag.

Sýning á margvíslegri skapandi vinnu nemenda á vorönninni verður opnuð í skólanum á laugardag kl. 13:00. Meðal annars gefur að líta verk úr portrettmálun, frumkvöðlafræði, listrænni sköpun, skapandi hannyrðum, jákvæðri sálfræði, fagurfræði, heimspeki og ljóð úr íslenskunni svo fátt eitt sé nefnt . Lokaverkefni nemanda á listabraut hefur vakið verðskuldaða athygli fyrir efnistök og hugmyndalega nálgun. Þar er unnið úr efnivið sem nemandinn tók með sér úr sjálfboðastarfi með flóttamönnum á grísku eynni Lesbos. Sýningin verður opin kl. 13-16 á laugardag en í næstu viku verður einnig hægt að njóta hennar á skólatíma fram að útskrift laugardaginn 25. maí.

Í síðustu kennslustundum áfangans „matur og menning“ var gestakennari Unnur María Máney, sirkuslistamaður með meiru. Viðfangsefnið var japanski rétturinn sushi. Nemendur voru mjög áhugasamir um þessa matargerð og lögðu sig alla fram. Kennarar og aðrir nemendur skólans voru ekki síður áhugasamir um að bragða á framleiðslunni, sem segjast verður að vakti mikla lukku. Í áfanganum er áhersla lögð á að fræða nemendur um matarmenningu mismunandi menningarsvæða. Unnið er með ríkjandi hefðir og fjallað um hvað er líkt eða ólíkt milli landa. Kennari í áfanganum er Ida Semey.

Nemendur í forritunaráfanga á starfsbraut buðu nemendum leikskólans í heimsókn á fimmtudag. Tilgangurinn var að kenna þeim á tækin sem nemendur MTR hafa verið að forrita og útskýra hvernig þau virka. Þetta eru lítil vélmenni sem kallast Coji en líka hefur verið unnið með Bloxels við að forrita tölvuleik. Skemmst er frá því að segja að gestir og gestgjafar áttu góða stund saman og nutu upplifunarinnar eins og myndirnar sýna.

Áfanginn heitir skapandi hannyrðir og er kenndur í fyrsta sinn nú á vorönninni. Nemendur kynnast mismunandi aðferðum við hannyrðir, svo sem prjóni, hekli, útsaum og hnýtingum. Þetta upplegg heillar stúlkur en pilta síður að því er virðist. Áfanginn er á fyrsta þrepi, blandaður hópur með nemendum MTR og Grunnskóla Fjallabyggðar. Sköpunin getur farið fram á ýmsum vettvangi, inni eða úti. Fyrir viku saumuðu nemendur í girðinguna við sundlaugina í Ólafsfirði. Mjög skapandi að fara eins langt út fyrir kassann og við getum og oft er engin verklýsing. Þeir sem sjá verkin vita ekki endilega hvað verið er að fara en við sem unnum verkin vitum það, segir Steinunn Ósk Ólafsdóttir. Við notum Pinterest síðuna mikið til að fá hugmyndir en best er þó að fá þær sjálfur. Stundum verða þær líka til í hópnum á meðan við erum að vinna, segir Steinunn Ósk. Kennari í áfanganum er Karólína Baldvinsdóttir.

Sjálfbærni og valdefling ungs fólks til atvinnusköpunar er þema Erasmusverkefnis sem MTR hefur tekið þátt í og lýkur á Ítalíu í næstu viku. Verkefnið tók tvö ár og er þema þess að finna leiðir til að efla nemendur til að takast á við framtíðina í hörðum heimi. Allir þátttakendur eru af landsbyggðinni í heimalöndum sínum og munu ef að líkum lætur þurfa að skapa eigin tækifæri til framfærslu í heimabyggð. Vinnan tengist meðal annars vistvænni ferðaþjónustu, listum og íþróttum. Samstarfsskólarnir eru á Lanzarote, einni Kanaríeyjanna og á Ítalíu. Heimsókn ítölsku og íslensku nemanna til Lanzarote í febrúar í fyrra tókst með miklum ágætum og í haust dvöldu hópar frá samstarfsskólunum hér á Tröllaskaga. Um helgina kynnti íslenski hópurinn sér sögu Rómar, skoðaði ýmsar menningarminjar og fylgdist með mannlífinu. Ellefu nemendur og tveir starfsmenn eru í ferðinni. MTR-nemar söfnuðu fyrir aukadvöl í Róm með því að þrífa bifreiðar. Þau kynntu spænskum og ítölskum félögum sínum hugmynd að bifreiðaþvottafyrirtæki sem hægt væri að stofna og reka á Tröllaskaga.