Fréttir

Nemendur í skapandi tónlist hafa æft með félögum sínum í London undanfarna daga en hópur frá skólanum er nú í námsferð í heimsborginni. Þetta er þó ekki í fyrsta sinn sem okkar menn hafa unnið með þessu fólki því um hríð hefur verið samvinna gegnum netið við nemendur í London College of Music, tónlistardeildinni innan University of West London.

Nú stendur yfir miðannarvika í skólanum og þá fellur hefðbundin kennsla niður en nemendur fást við ný og fjölbreytt verkefni og njóta leiðsagnar nýrra kennara. Kennarar skólans sinna hinsvegar námsmati í vikunni.

Þrettán manna hópur frá MTR er nú í námsferð í Lundúnum. Þetta eru ellefu nemendur og tveir kennarar sem munu dvelja í heimsborginni fram að helgi við leik og störf. Allt er þetta tónlistarfólk og markmið ferðarinnar er að kynnast tónlistarlífinu í borginni og spila á tónleikum með tónlistarnemum í London.

Sigríður Ásta Hauksdóttir, náms - og starfsráðgjafi og Guðrún Þorvaldsdóttir iðjuþjálfi halda utan um Nemendaþjónustu MTR þetta skólaár, en samhliða er starfandi stoðþjónustuteymi við skólann. Hlutverk teymisins er m.a. að finna leiðir til að mæta námslegum styrkleikum, vera kennurum til ráðgjafar um kennslu, samstarf við grunnskóla.

Forvarnardagurinn var haldinn í Menntaskólanum á Tröllaskaga í dag. Dagurinn er haldinn í skólum landsins á hverju hausti og þá er sjónum sérstaklega beint að ungmennum í 9. bekk og á fyrsta ári í framhaldsskóla, þema dagsins var andleg líðan ungmenna.

Árlegt árvekni- og fjáröflunarátak Krabbameinsfélags Íslands, Bleika slaufan, undir slagorðinu „VERUM TIL“ hefst í dag. Af þessu tilefni lagði fánastjóri skólans það til að keyptur yrði bleikur fáni og honum flaggað allan október til stuðnings verkefninu. Var það samþykkt með mikilli ánægju og var fáninn dreginn að hún í dag. Við erum fánastjóra skólans þakklát fyrir þessa góðu ábendingu og að við getum tekið þátt og leggja áherslu á að vera til. Lifum lífinu og verum til staðar þegar kona greinist með krabbamein og tilveran breytist snögglega.

Í dag er síðasti dagur Tallin ferðar fimm nemenda skólans. Dagurinn byrjaði á gönguferð í Lahemaa þjóðgarðinum og nú er vinna við gerð heimildarmyndar um ferðina. Áður en lagt var af stað i þjóðgarðinn var sunginn afmælissöngur fyrir Hrannar Breka en hann varð 19 ára í dag. Við óskum honum til hamingju með daginn.

Sextán kennarar, stjórnendur og starfsmenn í stoðþjónustu frá KVUC framhaldsskóla fullorðinna í Kaupmannahöfn heimsóttu okkur í vikunni. Þessi heimsókn hefur dregist í rúmt ár en loks gafst tækifærið. Í KVUC er fjarkennsla og virk notkun tækninnar þannig að fengur var að því að hitta þau og bera saman bækur. Starfsmenn MTR kynntu starfið hér fyrir þeim, þau hittu nemendur og miðluðu til okkar sinni starfsemi. Námsferð þeirra var styrkt af Evrópuverkefninu Erasmus+ sem við höfum einmitt notið góðs af. Gestirnir voru ánægðir með heimsóknina og töldu að þau hafðu haft af henni mikið gagn og hún hefði skapað samræðu um hugmyndir og starfshætti þeirra.

Annar vinnudagurinn hjá okkar mönnum í Tallin byrjaði á kennslu í Eistnesku en eftir það verður áframhaldandi vinna við að gera heimildarmynd um heimsóknina. Siðan verður farið á listasafn og deginum lýkur á að elda ssaman Eistneska þjóðarrétti

Fimm nemendur eru nú staddir í Tallin í Eistlandi og er það fyrsta utanlandsferð nemenda síðan heimsfaraldurinn brast á. Þeir taka þátt í Nordplus verkefni sem nefnist DRIL - Digital Routs for Intelligent Learning. Það passar því vel við hvernig námi og kennslu er háttað í MTR.