Unnið markvisst með Heimsmarkmiðin

UNESCO er alþjóða heitið á Menningarmálastofnun Sameinuðu þjóðanna. Meginmarkmið hennar er að stuðla að friði og öryggi í heiminum með því að efla alþjóðlega samvinnu á sviði menntunar, vísinda- og menningarmála. Á vegum UNESCO hefur verið starfrækt alþjóðlegt samstarfsnet skóla frá árinu 1953 og kallast það UNESCO-skólar. Þeir eru nú um 12.000 talsins og starfa í 182 landi á leik-, grunn– og framhaldsskólastigi. Skólarnir vinna eftir fjórum meginþemum; alþjóðasamvinna, starfsemi Sameinuðu þjóðanna, heimsmarkmiðin um sjálfbæra þróun og friður og mannréttindi.

MTR er einn af rúmlega tuttugu UNESCO-skólum á Íslandi og setur vinna sem tengist því sífellt meiri svip á skólastarfið. Á dögunum var gerð könnun meðal kennara skólans þar sem spurt var hver af heimsmarkmiðum Sameinuðu þjóðanna væru fléttuð inn í þeirra kennslugreinar á þessari önn. Niðurstöðurnar sýna að unnið er með fjölbreytt heimsmarkmið. Þessi standa upp úr:.

Heimsmarkmið 4: Góð menntun Kennarar leggja áherslu á að tryggja gæði menntunar og skapa tækifæri fyrir nemendur til að læra á fjölbreyttan hátt.

Heimsmarkmið 13: Aðgerðir í loftslagsmálum og Heimsmarkmið 12: Ábyrg neysla og framleiðsla Umhverfis- og sjálfbærnimenntun er fléttuð inn í ýmsar námsgreinar. Nemendur eru hvattir til að íhuga áhrif mannsins á umhverfið og hvernig hægt sé að stuðla að sjálfbærri framtíð.

Markmið sem tengjast samfélagslegri ábyrgð, eins og Heimsmarkmið 3: Heilsa og vellíðan og Heimsmarkmið 5: Jafnrétti kynjanna eru einnig nokkuð sýnileg í náminu enda leggur skólinn áherslu á vellíðan nemenda, jafnrétti og félagslega vitund.

Önnur heimsmarkmið eru notuð í minna mæli, en niðurstöðurnar sýna þó að kennarar nýta ýmis markmið sem tengjast beint þeirra námsgreinum. Almennt benda niðurstöðurnar til þess að sjálfbærni sé vel samþætt skólastarfinu og að kennarar séu meðvitaðir um mikilvægi þess að tengja heimsmarkmið Sameinuðu þjóðanna við nám og kennslu. Tilefni er þó til að skoða hvernig hægt sé að samþætta enn fleiri heimsmarkmið við kennsluefnið.

Einnig var spurt um mismunandi skilaform þessara verkefna hjá nemendum. Hér eru þau helstu sem eru í boði:

• Skýrslur og ritgerðir – Formleg verkefnaskil þar sem nemendur rannsaka efni og skila skriflegum niðurstöðum.
• Ljósmyndaverkefni – Notkun ljósmynda til að miðla skilaboðum um heimsmarkmiðin.
• Hlaðvörp – Nemendur taka upp og deila umræðum eða fræðslu um ákveðin málefni.
• Samfélagsmiðlaherferðir – Sköpun efnis fyrir samfélagsmiðla, t.d. Instagram eða TikTok, til að vekja athygli á málefnum.
• Myndbönd og kvikmyndagerð – Framleiðsla stuttra heimildarmynda eða fræðslumyndbanda.
• Leikir og spurningakeppnir – Nemendur búa til spil eða rafræn kennsluforrit tengd heimsmarkmiðunum.
• Listaverk Sköpun á listaverkum, veggspjöldum eða uppsetning á sýningum.
• Matreiðsluverkefni – Verkefni þar sem sjálfbær matarmenning er í forgrunni, oft með myndbands- eða textaskilum.

Þessi fjölbreyttu skilaform sýna að nemendur hafa ýmsar skapandi og stafrænar aðferðir til að miðla niðurstöðum sínum og auka vitund um heimsmarkmiðin.