Fjölþjóðlegt fyrirtæki

Promens rekur 41 verksmiðju í 19 löndum. Þetta er fjórða stærsta fyrirtæki landsins og hefur komist í gegn um efnahagskreppuna án afskrifta skulda. En það er búið að gera miklar skipulagsbreytingar á síðustu árum sagði Daði Valdimarsson, framkvæmdastjóri, nemendum í Tröllaskagaáfanga í dag.

Promens rekur 41 verksmiðju í 19 löndum. Þetta er fjórða stærsta fyrirtæki landsins og hefur komist í gegn um efnahagskreppuna án afskrifta skulda. En það er búið að gera miklar skipulagsbreytingar á síðustu árum sagði Daði Valdimarsson, framkvæmdastjóri, nemendum í Tröllaskagaáfanga í dag.

Daði sagði að það hefði verið lykill að velgengni fyrirtækisins að byrja á Dalvík og selja inn á sterkan heimamarkað. Íslenskur sjávarútvegur væri fljótur að tileinka sér nýjungar og á þessum tíma hefðu verið strandsiglingar þannig að flutningskostnaður hefði ekki verið mikill. Í dag væri erfitt að hefja rekstur af þessu tagi á landsbyggðinni. Velgengnin hefði líka byggst á því að starfsmenn hefðu verið metnaðarfullir og eigendur samhentir. Sem fyrr eru framleiðsluvörururnar plastker og margskonar umbúðir og aðrar vörur úr plasti.

Á tímabili keypti Promens fjölda verksmiðja víða um lönd en hefur nú endurskipulagt reksturinn mikið og meðal annars selt verksmiðjur í Norður-Ameríku. Fyrirtækinu er skipt í nokkur framleiðslusvið og er hvert þeirra nokkuð sjálfstætt. Velta samstæðunnar er í námunda við 100 milljarða á ári. Eigendur eru Horn, fjárfestingarfélag Landsbankans og Framtakssjóður, sem er í eigu íslensku lífeyrissjóðanna.